ქართული ოცნების აღმასრულებელი მდივნის, მამუკა მდინარაძის განცხადებით, პარტიის საარჩევნო შტატები აცრის მსურველ თითოეულ ადამიანს რეგისტრაციის გავლაში მთელი ქვეყნის მასშტაბით დაეხმარებიან. მისივე თქმით, მმართველი პარტია თავის მხრივ იღებს ვალდებულებას, მისი წარმომადგენლები ცენტრალურ, საოლქო, თუ საუბნო საარჩევნო კომისიებში, პარტიის სახელით არჩევნებში აქტიურად ჩართული ადამიანები, მაქსიმალურად იყვნენ ვაქცინირებულნი.

"გარდა ამისა, ჩვენი მოქალაქეების ნაწილი, განსაკუთრებით რეგიონებში, გარკვეული ტექნიკური პრობლემების გათვალისწინებით, ვერ ახერხებს ვაქცინაციის პროცესში ჩართვას, შესაბამისად, მთელი ქვეყნის მასშტაბით, ქართული ოცნების საარჩევნო შტაბები იღებენ პასუხისმგებლობას, ყოველდღიურ რეჟიმში იმუშაონ და აცრის მსურველ თითოეულ ადამიანს რეგისტრაციის გავლაში დაეხმარონ", — განაცხადა მდინარაძემ.

საქართველოში ბოლო დღეების განმავლობაში მძიმე ეპიდემიოლოგიური ვითარებაა. 10 აგვისტოს მონაცემებით, ქვეყანაში კორონავირუსის 5 697 ახალი შემთხვევა დადასტურდა, გამოჯანმრთელდა 2 713, ხოლო გარდაიცვალა — 54 ადამიანი.