დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, შეიძლება ჩამოყალიბდეს მიდგომა და კორონავირუსზე ბუსტერის გაკეთება ერთ ან ორ წელიწადში გახდეს შესაძლებელი. მისივე თქმით, ჯერჯერობით, რამდენიმე ქვეყანამ, ძირითადად, შუა აღმოსავლეთის ქვეყნებმა — გაერთიანებულმა ემირატებმა და ბაჰრეინმა დაიწყო ე.წ. ბუსტერი. ევროპულ ქვეყნებს კი საკანონმდებლო დონეზე ბუსტერის გაკეთება ჯერ არ დაუწყიათ. გამყრელიძის თქმით, ამაზე სამეცნიერო წრეებში სერიოზული მსჯელობები მიმდინარეობს.

"ჯანდაცვის მსოფლიო ორგანიზაციამ მოუწოდა განვითარებულ ქვეყნებს, რომ სექტემბრის ბოლომდე თავი შევიკავონ, რადგან მსოფლიოს დიდ ნაწილში ვაქცინები არ არის საკმარისი და არასამართლიანი განაწილებაა. ჯერ სასურველია ორჯერ აიცრან, რომელიც სერიოზულად ყველანაირი გართულებისგან გვიცავს და მერე ვიფიქროთ ბუსტერზე. პირად მოსაზრებას მოგახსენებთ, დიდი ალბათობაა იმის, რომ ბუსტერი გარკვეული თვეების შემდეგ დაშვებული იქნება და საჭირო გახდება. შეიძლება ჩამოყალიბდეს მიდგომა, რომ წელიწადში ან ორ წელიწადში ერთხელ შესაძლებელი გახდება ბუსტერის კეთება", — განაცხადა გამყრელიძემ TV პირველთან.