ინფექციური საავადმყოფოს დირექტორის, თენგის ცერცვაძის განცხადებით, წელიწადნახევრის განმავლობაში კორონავირუსით ჰოსპიტალს გარეთ 48 ადამიანი გარდაიცვალა. მისივე შეფასებით, ეს სხვა ქვეყნებთან შედარებით კარგი შედეგია.

"საქართველოში ჰოსპიტალს გარეთ გარდაცვალებულთა რიცხვი, კოვიდ გარდაცვლილთა რიცხვი, ანუ ბინებში დარჩენილების რიცხვი არის 48. 48 ადამიანი გარდაიცვალა სახლში, ეს მთელი წელიწადნახევრის განმავლობაში. მაშინ როდესაც, უცხოეთის ქვეყნებში მსოფლიოში ყველაზე კარგი ჯანდაცვის სისტემის მქონე ქვეყნებში ეს არის ასეულები და ათასები", — თქვა ცერცვაძემ რუსთავი 2-ის ეთერში.

ჟურნალისტის დაუსვა კითხვა, თუ რატომ ვერ მოხერხდა ამ ადამიანების გადაყვანა კლინიკებში. ცერცვაძემ კი აღნიშნა, რომ ეს კითხვა პირიქით უნდა ყოფილიყო დასმული — "როგორ მოხერხდა იმდენი ხალხის გადაყვანა, რომ მხოლოდ 48 ადამიანი გარდაიცვალა ბინაზე, როცა ინგლისი ათიათასობით ასეთი შემთხვევა იყო, რა ინგლისში ვერ მოხერხდა? საქართველოს ყავს ყველაზე დაბალი რიცხვი ბინაზე გარდაცვლილების."

"იმიტომ არ გადაიყვანეს ისინი, რომ მაშინ, როდესაც ის ნახა ექიმმა ან სასწრაფომ, არ იყო მძიმე, კრიტიკული არ იყო. ეს არაპროგნოზირებადი დაავადებაა, რომელიც შიძლება დაიწყოს იოლად და დამძიმდეს რამოდენიმე საათში ან რამოდენიმე დღეში", — აღნიშნა ცერცვაძემ.

პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 440 353-ს, ჯამში გამოჯანმრთელებულთა რაოდენობა გაიზარდა 395 505-მდე, ხოლო პანდემიის გავრცელებიდან დღემდე ვირუსს ჯამში 6 016 პირი ემსხვერპლა.