პარლამენტის 10 მარტის პლენარულ სხდომაზე, დეპუტატებმა პირველი მოსმენით განიხილეს და 83 ხმით არცერთის წინააღმდეგ მხარი დაუჭირეს საკანონმდებლო პაკეტს, საგზაო მოძრაობის შესახებ.

კერძოდ, კანონპროექტი გულისხმობს უკონტაქტო პატრულირებასა და მართვის მოწმობის 100-ქულიანი სისტემის შემოღებას. ქულები შემცირდება საგზაო მოძრაობის წესების ყოველი დარღვევისას.

განმარტებით ბარათში ვკითხულობთ, რომ კალენდარული წლის განმავლობაში სამართალდარღვევების გამო ქულების 0-მდე შემცირება მართვის უფლების შეჩერებას გამოიწვევს და მართვის უფლების მისაღებად პირი იძულებული იქნება გამოცდა ხელახლა ჩააბაროს.

კალენდარული წლის განმავლობაში ქულების 0-მდე განმეორებით შემცირების შემთხვევაში სამართალდამრღვევს არ ექნება უფლება გავიდეს მართვის უფლების მისაღებ გამოცდაზე მართვის უფლების შეჩერებიდან 1 კალენდარული წლის გასვლამდე.

ასევე, კანონში დაგეგმილი ცვლილება ითვალისწინებდა მარჯვენასაჭიანი და საჭეგადატანილი მანქანების რეგისტრაციის აკრძალვას, თუმცა კანონპროექტთა პაკეტიდან შინაგან საქმეთა სამინისტრომ აღნიშნული მუხლი ამოიღო.