მონეტარული პოლიტიკის განაკვეთი 0,5 პროცენტული პუნქტით, 10%-მდე გაიზარდა — რას ნიშნავს ეს?
![](http://ross.on.ge/2021/02/01/1612170991_6017c860ebe97.jpg)
ფოტო: საქართველოს ეროვნული ბანკი
დღეს, 4 აგვისტოს გამართულ სხდომაზე საქართველოს ეროვნული ბანკის მონეტარული პოლიტიკის კომიტეტმა რეფინანსირების განაკვეთი 0,5 პროცენტული პუნქტით, 10%-მდე გაზარდა. აღნიშნული განაკვეთი ამაზე მაღალი ბოლოს 2008 წელს იყო.
როდესაც მონეტარული პოლიტიკის განაკვეთი იზრდება, მსესხებლებს მასზე მიბმული კრედიტები უძვირდებათ. 2021 წლის 1 ივლისის მდგომარეობით ცვლად საპროცენტო განაკვეთზე მიბმული 140 100 სესხია გაცემული. მათი აბსოლუტური უმრავლესობა რეფინანსირების განაკვეთზეა მიბმული — შესაბამისად, ყველა ამ მომხმარებელს კრედიტების მომსახურება 0,5%-ით გაუძვირდება.
რეფინანსირების განაკვეთი
რეფინანსირების განაკვეთი ეროვნული ბანკის ხელთ არსებული ინსტრუმენტია, რომლის საშუალებითაც ის ფასების სტაბილურობას უზრუნველყოფს. როდესაც რეფინანსირების განაკვეთი იზრდება, ამას მონეტარული პოლიტიკის გამკაცრებას უწოდებენ — ამ დროს მსესხებლებს აღნიშნულ განაკვეთზე მიბმული კრედიტები უძვირდებათ. შესაბამისად, ადამიანები ამცირებენ ხარჯვას, რის გამოც მცირდება საერთო მოთხოვნა — ეს კი ფასების ზრდას უშლის ხელს.
მიმდინარე წლის აპრილის მიწურულს რეფინანსირების განაკვეთი 1 პროცენტული პუნქტით, 9,5%-მდე გაიზარდა, რის შედეგადაც 125 ათასამდე მსესხებელს განაკვეთზე მიბმული კრედიტი გაუძვირდა.
დღევანდელ სხდომაზე ცნობილი გახდა, რომ ეროვნული ბანკი მიმდინარე წელს 9%-ზე მაღალ ინფლაციას ელოდება, რის გამოც ბანკი მკაცრი მონეტარული პოლიტიკის ხანგრძლივად შენარჩუნებასა და, საჭიროების შემთხვევაში, დამატებით გამკაცრებასაც აპირებს.
ინფლაცია
2021 წლის ივლისში წლიურმა ინფლაციამ 11,9% შეადგინა — ფასების ზრდის ამაზე მაღალი მაჩვენებელი ბოლოს 2011 წლის მაისში დაფიქსირდა, როდესაც წლიური ინფლაცია 14,3% იყო.
რაც შეეხება გასულ თვეებს, ივნისში წლიური ინფლაციის დონე 9,9%, მაისში — 7,7%, ხოლო აპრილსა და მარტში — 7,2% იყო.
ეროვნული ბანკის პრეზიდენტი, კობა გვენეტაძე ამბობს, რომ ქვეყანაში არსებულ მაღალ ინფლაციაზე ყველაზე დიდი გავლენა მსოფლიო ბაზრებზე სურსათისა და ნავთობის მკვეთრად გაზრდილმა ფასებმა მოახდინა. მისი თქმით, მნიშვნელოვნად მოიმატა საერთაშორისო ტრანსპორტირების ხარჯებმაც, რაც, ასევე, იმპორტირებული პროდუქციის ფასებზე ახდენს გავლენას.
გვენეტაძის თქმით, გამკაცრებული მონეტარული პოლიტიკით და ერთჯერადი გარეგანი ფაქტორების მოსალოდნელი მილევის ფონზე, არსებული პროგნოზით, 2022 წელს ინფლაცია შემცირებას დაიწყებს და მის საშუალოვადიან მიზნობრივ მაჩვენებელს ეტაპობრივად დაუახლოვდება.
ცნობისთვის, ეროვნული ბანკის მიერ დადგენილი ინფლაციის მიზნობრივი მაჩვენებელი 3%-ია.
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
კომენტარები