პრემიერმინისტრი, ირაკლი ღარიბაშვილი მთავარი არხის მიერ გასაჯაროებულ ჩანაწერებს შეთქმულებასა და ბინძურ პროვოკაციას უწოდებს.

"სუს-ი, პოლიცია, ყველა ახორციელებს კანონით დადგენილ მოსმენებს. თქვენ რაზე საუბრობთ არ ვიცი, თქვენ ხართ პოლიტიკური ტელევიზია, თქვენ არ ხართ დამოუკიდებელი. ეს არის მორიგი შეთქმულება და ბინძური პროვოკაცია ერთ-ერთი ყველაზე მნიშვნელოვანი სახელმწიფო უწყების მიმართ, სახელმწიფო უსაფრთხოების სამსახურის მიმართ. რა თქმა უნდა, ზედმეტი სერიოზული კომენტარი არ შეიძლება ამაზე გავაკეთო", — აცხადებს ღარიბაშვილი.

ჟურნალისტის შეხსენებაზე, რომ აღნიშნული ჩანაწერის ერთ-ერთი ფრაგმენტის ნამდვილობას რადიო თავისუფლების ჟურნალისტი ადასტურებს, ღარიბაშვილი ამბობს, რომ არ იცის და არ არის საინტერესო.

მთავარი არხის დირექტორმა ნიკა გვარამიამ განაცხადა, რომ მოიპოვა სახელმწიფო უსაფრთხოების სამსახურის დოკუმენტები, სადაც პოლიტიკოსებზე, სასულიერო პირებზე, ჟურნალისტებზე, ბიზნესმენებზე, საჯარო მოხელეებზე თვალთვალია ასახული. სავარაუდოდ, სუს-ის ჩანაწერებიდან, ირკვევა, რომ უწყებაში აქვთ ინფორმაცია ხსნებული საზოგადოებაში აქტიური პირების სექსუალური ორიენტაციის, პირადი ცხოვრების, სექსუალური პარტნიორების შესახებ და ეს ყველაფერი აღწერილია უწყების დოკუმენტში. ისევე, როგორც ჟურნალისტების სატელეფონო ზარები სხვადასხვა უწყებების პრესსამსახურებთან. გვარამია ამბობს, რომ ეს ჩანაწერები ქართული ოცნების დამფუძნებლის, ბიძინა ივანიშვილისთვის კეთდება და პროცესში სუს-ის უფროსები არიან ჩართული.