ჰომოფობიური განწყობების გამო, სვანეთში გაუქმდა გადაღება, რომელშიც მონაწილეობა ჰოლივუდის ვარსკვლავს უნდა მიეღო. ინფორმაციას ამის შესახებ Mercedes-Benz Fashion Week Tbilisi-ის დამფუძნებელი, სოფო ჭყონია ავრცელებს. On.ge მას დამატებითი ინფორმაციისთვის დაუკავშირდა.

სოფო ჭყონიამ გვითხრა, რომ გადაღებებს გეგმავდა ძალიან დიდი და ცნობილი ფრანგული მოდის სახლი, თუმცა კონტრაქტის პირობებიდან გამომდინარე, ვერც მოდის სახლისა და ვერც ჰოლივუდის მსახიობის სახელს ვერ ამბობს. მისივე ინფორმაციით, გადაღებები მთლიანად საქართველოში უნდა გამართულიყო, თუმცა მთავარ ლოკაციად სვანური კოშკები იყო შერჩეული.

"მსახიობმა უარი თქვა და ჯგუფსაც შეეშინდა, სამწუხაროდ. პანდემიამდე დავიწყეთ მოლაპარაკება და სწორედ ახლა, ზაფხულში უნდა გადაეღოთ. გადაღებამდე ვაწერთ ხოლმე ხელს, რომ სახელს და ადგილს არ ვიტყვით. ერთი შემიძლია გითხრათ, რომ ეს იყო ძალიან დიდი და ცნობილი ფრანგული მოდის სახლი და ჰოლივუდის ვარსკვლავი უნდა გადაეღოთ სვანეთში. სარეკლამო კამპანიის გადაღება იყო მთლიანად საქართველოში დაგეგმილი. მაგრამ სვანური კოშკები მათ ასე ვთქვათ მთავარ ლოკაციად შეარჩიეს", — გვითხრა სოფო ჭყონიამ.

მისივე ინფორმაციით, ამ გადაღებაზე მოლაპარაკებები ერთი წლის განმავლობაში მიმდინარეობდა, საქართველოში გადაღება მან შესთავაზა და თავადაც საქართველოს მხრიდან პროდიუსერი იყო.

ეს არ არის პირველი შემთხვევა, როცა უცხოელები საქართველოში ჩამოსვლაზე უარს ამბობენ. ჰომოფობიური ჯგუფების მიერ ორგანიზებული ძალადობრივი აქციების შემდეგ პერიოდულად ვრცელდება ინფორმაცია, რომ ტურისტები საქართველოში დაგეგმილი ვიზიტებს აუქმებენ.

5-6 ივლისს ჰომოფობიურ დია ძალადობრივი ჯგუფების თავდასხმის შედეგად 50-ზე მეტი ადამიანი დაშავდა, მათგან უმრავლესობა მედიის წარმომადგენელია. ძალადობრივი ჯგუფები თავს დაესხნენ თბილისი პრაიდის, სირცხვილიასა და ადამიანის უფლებათა ცენტრის ოფისებსაც. 11 ივლისს, TV პირველის ოპერატორი, ლექსო ლაშქარავა გარდაიცვალა. ის ერთ-ერთია იმ ათობით მედიის წარმომადგენელს შორის, რომელსაც 5 ივლისს ძალადობრივი კონტრაქციის მონაწილეები ფიზიკურად გაუსწორდნენ. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები.

5-6 ივლისის ძალადობას წინ უძღოდა ქართული ოცნების ლიდერების განცხადებები, რომ ღირსების მარშს მიზანშეწონილად არ მიიჩნევენ. 5 ივლისს, როცა უკვე დაწყებული იყო ძალადობა, ღარიბაშვილმა ისევ თბილისი პრაიდი გააკრიტიკა, რამდენიმე დღეში კი გაიმეორა ჰომოფობიური ჯგუფების გზავნილი პროპაგანდის შესახებ.

"როდესაც 95% ჩვენი მოსახლეობის არის წინააღმდეგი დემონსტრაციულად პროპაგანდისტული, მარშისტული აღლუმის ჩატარების, ამას, მეგობრებო, ყველანი უნდა დავემორჩილოთ. ეს არის ჩვენი მოსახლეობის აბსოლუტური უმრავლესობის აზრი. ჩვენ, როგორც ხალხის მიერ არჩეული ხელისუფლება, იძულებული ვართ, რომ ამას ანგარიში გავუწიოთ, ამას ყოველთვის გავუწევთ ანგარიშს. ისე აღარ იქნება, როცა უმცირესობა წყვეტდა ყოველთვის უმრავლესობის ბედს, როცა მათი ძალადობრივი ხელწერით ნებისმიერ გადაწყვეტილებას ღებულობდნენ საქართველოში".

ჰომოფობიური და ძალადობრივი კონტრაქციის ორგანიზატორები ამ დრომდე არ დაუკავებიათ.