პარტია გირჩის ერთ-ერთი ლიდერი, ვახტანგ მეგრელიშვილი ქართული ოცნების მიერ შარლ მიშელის შეთანხმების ანულირებას პოლარიზაციისკენ გადადგმულ ნაბიჯს უწოდებს და აღნიშნავს, რომ ეს გადაწყვეტილება ეწინააღმდეგება შარლ მიშელის სულისკვეთებას.

მეგრელიშვილს მიაჩნია, რომ ბოიკოტის ნაცვლად, ყველა ოპოზიციური პარტია პარლამენტში უნდა შევიდეს და ქართული ოცნების თამაში არ ითამაშონ.

"მგონია, რომ ფაქტობრივად, ქართული ოცნება, თუ სწორად მესმის მე სიტუაცია, ყველა კოზირს ოპოზიციას გვიტოვებს, თუ ჩვენც ჭკვიანურად მოვიქცევით. იმიტომ რომ ქართული ოცნების დღევანდელი განცხადება ყველა კომპონენტში იყო შეცდომა", — განაცხადა ვახტანგ მეგრელიშვილმა.

ქართულმა ოცნებამ დღეს განაცხადა, რომ შარლ მიშელის შეთანხმება ანულირებულია. პარტიის თავმჯდომარის, ირაკლი კობახიძის თქმით, შეთანხმებას მხოლოდ თავად ასრულებენ, რაც არასწორად მიაჩნიათ. მან ოპოზიციას დააბრალა შეთანხმების არშესრულება. ამასთან, მისივე თქმით, ქართული ოცნება უარს ამბობს აქამდე დაპირებულ 43%-იან ბარიერზე და აცხადებს, რომ ახალი არჩევნები მათი "კეთილი ნებით" 53%-ის მიღების შემთხვევაშიც ჩატარდება, თუ გადაწყვეტენ, რომ ოპოზიცია მზად არის კოალიციური მმართველობისთვის.