არქიმანდრიტმა ილია თოლორაიამ, რომელიც სამების საკათედრო ტაძარში მსახურობს, კორონავირუსის ვაქცინა გაიკეთა. როგორც მამა ილიამ On.ge-ს უთხრა, დღეს სინოფარმის მეორე დოზით აიცრა. მასთან ერთად ვაქცინა გაიკეთეს სხვა სასულიერო პირებმაც. კერძოდ: არქიმანდრიტი დოროთე, არქიმანდრიტი შიო და იღუმენი ანდრია.

ილია თოლორაია On.ge-სთან ამბობს, რომ როცა არსებობს საშიშროება ასეთი ვერაგი ავადმყოფობის, როგორიც კორონავირუსია, თავი უნდა დავიცვათ.

"ეს ხომ არ არის საღვთისმეტყველო თემა, სამედიცინო სფეროს ეკუთვნის და ასეთ დროს ჯობია ექიმებს დავუჯეროთ. მე პირადად, ჩვენ ექიმების დაჯერებიდან გამომდინარე, ასე გავაკეთეთ. თუ სხვაც ისურვებს, რომ ექიმებს დაუჯეროს ასეთ დროს კარგი იქნება", — ამბობს არქიმანდრიტი ილია.