გერმანიის ქალ ტანმოვარჯიშეთა ნაკრების წევრებმა უარი განაცხადეს ბიკინის ქვედატანის ფორმის კოსტიუმების ჩაცმაზე და ოლიმპიურ თამაშებზე ისეთი კოსტიუმებით გამოჩნდნენ, რომლებიც მათ სხეულს მთლიანად ფარავს. გუნდის წევრებს მსგავსი ფორმები ხუთშაბათს ვარჯიშის დროსაც ეცვათ. გერმანიის ტანვარჯიშის ფედერაცია ქალების გადაწყვეტილებას მხარს უჭერს და ამას სპორტში სექსუალიზების პრობლემის წინააღმდეგ ხმის ამაღლებად მიიჩნევს.

"მთავარია, რომელ ტანსაცმელში გრძნობ თავს კომფორტულად. ჩვენ გვინდა, ვანახოთ ქალებს, ადამიანებს, რომ ყველა თავად უნდა ირჩევდეს, რა ჩაიცვას', — აცხადებს ტანმოვარჯიშე ელიზაბეთ ზაიცი.

გერმანიის ქალ ტანმოვარჯიშეთა გუნდი ახალი კოსტიუმებით პირველად აპრილში, შვეიცარიაში გამართულ ევროპის ჩემპიონატზე წარსდგა. ელიზაბეთის თქმით, სხვა სპორტსმენებს მათი კოსტიუმები ძალიან მოეწონათ და იმედოვნებს, რომ უფრო მეტი ადამიანი გადაწყვეტს ის ტანსაცმელი ჩაიცვას, რომელშიც თავს კომფორტულად გრძნობს.

ფოტო: EPA

"უმეტესობა ამ ამბავს პოზიტიურად შეხვდა, თუმცა ევროპის ჩემპიონატის შემდეგ ახალი კოსტიუმების შექმნისთვის ცოტა დრო ჰქონდათ. იქნებ, მომავალში მოხერხდეს. დიდი იმედი გვაქვს, რომ ასეც იქნება", — ამბობს ელიზაბეთი.

ქალებმა ოლიმპიადაზე ახალი კოსტიუმების ჩაცმის გადაწყვეტილება ერთად მიიღეს და მათ მხარი მწვრთნელებმაც დაუჭირეს.

"გადაწყვეტილებაზე დიდი გავლენა ქალებს გვქონდა. მწვრთნელებმაც დაგვიჭირეს მხარი. მათ გვითხრეს, რომ უნდათ ნებისმიერ სიტუაციაში თავი მაქსიმალურად თავდაჯერებულად და კომფორტულად ვიგრძნოთ", — ამბობს ტანმოვარჯიშე სარა ფოსი.

აღსანიშნავია, რომ ამგვარ კონკურსებზე აქამდე ქალები ფეხებს მხოლოდ რელიგიური მიზეზების გამო იფარავდნენ. ევროპის ჩემპიონატზე გერმანელი სპორტსმენების საქციელმა მოწონება დაიმსახურა სხვა ქვეყნების დელეგაციების მხრიდანაც. ნიდერლანდების ფედერაციის პრესსპიკერის თქმით, ჟიურის ხშირად დაუკლია მონაწილეებისთვის ქულები, როცა ისინი საკუთარი კოსტიუმის "გაკომფორტულებას" ცდილობდნენ.

როგორც ამას ბევრი სპორტსმენი ქალი აღნიშნავს, ტანვარჯიშში სექსუალიზებასთან ერთად ხშირია სექსუალური შევიწროებისა და ძალადობის შემთხვევებიც.

ამერიკელი ტანმოვარჯიშე, სიმონ ბაილსი, რომელიც სექსუალური ძალადობის მსხვერპლი თავადაც გახდა სპორტული ექიმის მხრიდან, ამბობს, რომ წლევანდელ ოლიმპიურ თამაშებში მონაწილეობის ერთ-ერთი მიზანი ამ პრობლემაზე ღიად საუბარი და სხვებისთვის ხმის მიწვდენაა.

ამავე თემაზე: