TV პირველის ოპერატორზე, ლექსო ლაშქარავაზე თავდასხმის გამო დაკავებულ გია გიგუაშვილს სასამართლომ აღკვეთის ღონისძიების სახით პატიმრობა შეუფარდა.

გიგუაშვილი პოლიციამ 24 ივლისს დააკავა, მას შსს ჟურნალისტისთვის პროფესიულ საქმიანობაში ძალადობას მუქარით, უკანონოდ ხელის შეშლას, ძალადობითა და ძალადობის მუქარით დევნას და ჯგუფურად ჩადენილ ძალადობას ედავება. გამოძიებაც ამ მუხლებით მიმდინარეობს — საქართველოს სისხლის სამართლის კოდექსის 154-ე მუხლის მე-2 ნაწილი, 156-ე მუხლის მე-2 ნაწილის "ა" ქვეპუნქტი და 225-ე მუხლის მე-2 ნაწილი.

შსს-ს ინფორმაციით, 5-6 ივლისს გამართული აქციების მიმდინარეობის დროს ჟურნალისტისთვის პროფესიულ საქმიანობაში ძალადობის მუქარით, უკანონოდ ხელის შეშლის, ძალადობითა და ძალადობის მუქარით დევნის, ასევე, ჯგუფური ძალადობის ფაქტებზე სულ დაკავებულია 29 პირი. კერძოდ:

  • ჟურნალისტებისთვის პროფესიულ საქმიანობაში ძალადობის მუქარით, უკანონოდ ხელის შეშლის, ჯგუფური ძალადობის და ძალადობის მუქარით დევნის ფაქტებზე დააკავეს 25 პირი;
  • თბილისი პრაიდის ოფისის დარბევისთვის, ჯგუფურ ძალადობაში მონაწილეობის, ძალადობით ან ძალადობის მუქარით დევნის, ასევე, ბინის ან სხვა მფლობელობის ხელშეუხებლობის ჯგუფურად დარღვევის ფაქტზე დაკავებულია 3 პირი;
  • მოქალაქის მიმართ ჩადენილი ძალადობისთვის დაკავებულია 1 პირი.

შსს-ში ამბობენ, რომ "დანაშაულში მონაწილე სხვა პირთა დადგენა-დაკავების მიზნით გრძელდება საგამოძიებო-ოპერატიული ღონისძიებები".