საქართველოში აშშ-ის ელჩი, კელი დეგნანი აცხადებს, რომ აშშ გააგრძელებს სახალხო დამცველის აპარტთან მუშაობას თანამშრომლობის გასაღრმავებლად და სახალხო დამცველის მნიშვნელოვანი როლის მხარდასაჭერად, რომელსაც ის ასრულებს ქართული დემოკრატიის განმტკიცებაში. ამის შესახებ მან ომბუდსმენთან გამართული შეხვედრის შემდეგ განაცხადა. შეხვედრის შესახებ ინფორმაციას ომბუდსმენის აპარატი ავრცელებს.

"ძალიან კარგი შესაძლებლობა მქონდა განმეხილა სახალხო დამცველთან და მის გუნდთან ბოლო პერიოდში საქართველოში ადამიანის უფლებებთან დაკავშირებული საკითხები. სახალხო დამცველის ინსტიტუტი თამაშობს უაღრესად მნიშვნელოვან როლს ნებისმიერ დემოკრატიაში, განსაკუთებით აქ, საქართველოში, მაშინ როდესაც ქვეყანა ძალიან მნიშვნელოვან და რთულ საკითხებს უმკლავდება", — განაცხადა კელი დეგნანმა შეხვედრის დასრულების შემდეგ.

სახალხო დამცველის აპარატის ინფორმაციით, შეხვედრაზე ბოლო პერიოდში საქართველოში ადამიანის უფლებებთან დაკავშირებული საკითხები განიხილეს და უზენაეს სასამართლოში მოსამართლეთა დანიშვნის პროცესზე იმსჯელეს.

"ჩვენ დღეს ყურადღება გავამახვილეთ უზენაეს სასამართლოში განხორციელებულ მოსამართლეთა დანიშვნის პროცესზე და იმ პრობლემებზე, რასაც ამ პროცესში ვხედავთ. ასევე, ვისაუბრე 5-6 ივლისს განვითარებულ მოვლენებზე, ხაზი გავუსვი სახელმწიფოს და სამართლადამცავი ორგანოების პასუხისმგებლობას და აღვნიშნე, რომ სამწუხაროდ, მიუხედავად არაერთი მტკიცებულებისა და ინდიკატორისა, სამართლადამცავ ორგანოებს დღემდე არავინ არ მიუცია პასუხიგებაში ამ ძალადობრივი ქმედებისთვის", — განაცხადა ნინო ლომჯარიამ.

სახალხო დამცველის აპარატში აცხადებენ, რომ ნინო ლომჯარია და კელი დეგნანი რეგულარულად მართავენ შეხვედრებს, რომლებზეც ადამიანის უფლებათა აქტუალურ საკითხებზე მსჯელობენ და საუბრობენ.