თეთრი ხმაურის მოძრაობა აცხადებს, რომ ლევან აბზიანიძის გარდაცვალებიდან 1 წლისა და 8 თვის თავზე, ექსპერტიზამ სიკვდილის მიზეზად სამი აბი შარდმდენის ნაცვლად გულის ქრონიკული იშემიური დაავადება დაასახელა:

"ეს ყველაფერი კი იმ ფონზე როდესაც აბზიანიძის სისხლში შარდმდენ პრეპარატ ფუროსემიდის კვალი დადასტურებულია და ცნობილია, თუ როგორ აიძულებდნენ პოლიციის თანამშრომლები რამდენიმე საათის განმავლობაში აბების დალევას. ასევე ცნობილია, რომ ნარკოლოგიური ექსპერტიზის ბიუროში გადაყვანის შემდგომ მოშარდვის სამარცხვინო პროცედურა მას სამჯერ გაამეორებინეს".

ლევან აბზიანიძე 2015 წლის 17 ივნისს გარდაიცვალა. მოძრაობა ამ ფაქტს საქართველოს ისტორიაში "სამარცხვინო ლაქას" უწოდებს. აქტივისტები სრულ უნდობლობას უცხადებენ გამოძიებასა და ცალკეულ ინსტიტუტებს, რომლებიც, მათი თქმით, "ადამიანის წამებით მკვლელობის ფაქტის უბედურ შემთხვევად შენიღბვას ცდილობენ".

თეთრი ხმაური მიიჩნევს, რომ ექსპერტიზის დასკვნას არსებითი ღირებულება არ გააჩნია:

"ლევან აბზიანიძის თუნდაც გულის შეტევით გარდაცვალება არათუ ასუსტებს სახელმწიფოს პასუხისმგებლობას, არამედ პირიქით, კიდევ უფრო ამძიმებს ვითარებას. ფაქტია, აბზიანიძის გარდაცვალება მისი რამდენიმე საათიანი წამების პირდაპირი შედეგია.

ვდებთ პირობას, რომ აბზიანიძის, დემურ სტურუას თუ დღემდე მოქმედი ნარკოპოლიტიკის შედეგად მოკლული იმ ადამიანების უკვდავსაყოფად, რომელთა ვინაობაც უცნობი დარჩა, არ შევწყვეტთ ხმაურს სისტემის ძალადობრივი მექანიზმის ძირეულ გარდაქმნამდე!"

56 წლის ლევან აბზიანიძე 2015 წლის 17 ივნისს გარდაცვლილი იპოვეს ქუთაისში. რუსთავი 2-ის ინფორმაციით, ცხედარი ერთ-ერთ ცენტრალურ ქუჩაზე, სკამზე ნახეს.