ჯანდაცვის მინისტრის მოადგილის, თამარ გაბუნიას განცხადებით, ბავშვებში კორონავირუსის გავრცელების შედეგად, ადგილების არარსებობის გამო, დამატებით საბავშვო კლინიკები დაამატეს.

"ადგილები უკვე აღარ იყო. პირველად ხდება მთელი პანდემიის ისტორიაში, როდესაც ბავშვების საწოლების დამატება გვიწევს", — განაცხადა გაბუნიამ რუსთავი 2-თან.

ციციშვილის სახელობის ბავშვთა ახალი კლინიკის სამედიცინო დირექტორის, მაია ჩხაიძის თქმით კი, მათ რეანიმაციულ განყოფილებაში მოთავსებული კორონავირუსით ინფიცირებული 3 ჩვილიდან ერთის ჯანმრთელობის მდგომარეობა განსაკუთრებით მძიმეა.

როგორც მაია ჩხაიძემ რუსთავი 2-ს უთხრა, ჩვილი მართვით სუნთქვაზე იმყოფება. მას კორონავირუსის "დელტა" შტამი აქვს. ჩხაიძის თქმით, ამ ეტაპზე კლინიკაში Covid-19-ით ინფიცირებული 67 ბავშვია მოთავსებული.

ჯანდაცვის მინისტრის მოადგილე, თამარ გაბუნიამ 13 ივლისსაც განაცხადა, რომ ბავშვებში კორონავირუსის ინფექციის გავრცელების მაჩვენებელია მაღალია.

15 ივლისის მონაცემებით, საქართველოში კორონავირუსის 1 398 ახალი შემთხვევა დადასტურდა, გამოჯანმრთელდა 1 164, ხოლო გარდაიცვალა — 11 ადამიანი.

ბოლო 24 საათში ქვეყნის მასშტაბით ჩატარდა 30 867 კვლევა ტესტით, მათ შორის ანტიგენის სწრაფი ტესტით — 16 167, ხოლო PCR-ით — 14 700.

NCDC-ზე გამოქვეყნებული ინფორმაციის თანახმად დადებითობის დღიური მაჩვენებელი არის 3,65%, ბოლო 7 დღის — 3,7%, ხოლო 14 დღის — 3,17%.