ჯანდაცვის მინისტრის, ეკატერინე ტიკარაძის განცხადებით, ინფექციის დღევანდელი გავრცელება შეზღუდვების გონივრულ დაწესებასთან მიმართებაში მსჯელობის დაწყებაზე მიუთითებს.

"ინფექციის დღევანდელი გავრცელება ჩვენ მიგვითითებს, რომ მნიშვნელოვანია, დავიწყოთ მსჯელობა შეზღუდვების გონივრულ დაწესებასთან მიმართებაში, რათა არ მივიღოთ ის ეფექტი, რომელიც შარშან გვქონდა", — განაცხადა ტიკარაძემ იმედის ეთერში.

ჯანდაცვის მინისტრის მოადგილე, თამარ გაბუნიამ დღეს, ასევე, თქვა, რომ ქვეყანაში ეპიდემიური სიტუაცია უარესდება, ამიტომ, გასართობი ღონისძიებების შეზღუდვაზე ფიქრი დაიწყეს.

15 ივლისის მონაცემებით, საქართველოში კორონავირუსის 1 398 ახალი შემთხვევა დადასტურდა, გამოჯანმრთელდა 1 164, ხოლო გარდაიცვალა — 11 ადამიანი.

ბოლო 24 საათში ქვეყნის მასშტაბით ჩატარდა 30 867 კვლევა ტესტით, მათ შორის ანტიგენის სწრაფი ტესტით — 16 167, ხოლო PCR-ით — 14 700.

NCDC-ზე გამოქვეყნებული ინფორმაციის თანახმად დადებითობის დღიური მაჩვენებელი არის 3,65%, ბოლო 7 დღის — 3,7%, ხოლო 14 დღის — 3,17%.