განათლების მინისტრმა და მესამე ვიცე-პრემიერმა ალექსანდრე ჯეჯელავამ TV პირველზე დიანა ტრაპაიძესთან ჩართვისას მედიაომბუდსმენის ინსტიტუტის ინიციატივაზე ისაუბრა:

"მედიის თავისუფლება ჩვენი მონაპოვარია, საქართველო კი დემოკრატიულად ახლა ვითარდება და ამ დემოკრატიას სჭირდება გამყარება. საერთაშორისო კლასის მედიაომბუდსმენი შესაძლოა იყოს ძალიან კარგი დამატება ამისთვის".

ჟურნალისტის კითხვაზე, არის თუ არა ხელისუფლების ადგილი იქ, სადაც ისედაც არსებობს ჟურნალისტური ეთიკის საბჭო და ომბუდსმენის აპარატი, ალექსანდრე ჯეჯელავამ უპასუხა:

"იცით მედიაომბუდსმენი ხელისუფლების ნაწილად არ მოიაზრება ცხადად, ესაა ამ ინიციატივის შინაარსი, რომ ის დამოუკიდებელი იყოს ხელისუფლებისგან და სამთავრობო გუნდისგან. მე ვხედავ ადგილს და მით უმეტეს ამ ადგილს ვხედავ, როცა საუბარია საერთაშორისო მაღალი რანგის ექსპერტზე".

გუშინ, პრემიერმინისტრმა გიორგი კვირიკაშვილმა კოალიცია მედია ადვოკატირებისთვის წევრ ორგანიზაციებთან შეხვედრისას განაცხადა, რომ შეიქმნება მედიაომბუდსმენის ინსტიტუტი, სადაც მოიწვევენ მსოფლიოში ყველაზე მაღალი რეპუტაციის მქონე მედიის უფლებადამცველებს.