TV პირველის ოპერატორის, ალექსანდრე ლაშქარავას გარდაცვალებაში ვანისა და ბაღდათის მიტროპოლიტი ანტონი ჟურნალისტებს ადანაშაულებს. მისივე მტკიცებით, ჟურნალისტებმა ცემა დაიმსახურეს. მან, ასევე, მედიის წარმომადგენლები მოძალადეებად მოიხსენია და თქვა, რომ მედიის წარმომადგენლები მათ ღირსებას ულახავენ. ის ინტერვიუს დროს ჟურნალისტს სახეზე თითით შეეხო, ჟურნალისტის პროტესტის შემდეგ კი თქვა, რომ ხელით კი არ შეეხო, "დააპიპინა".

"გვიწევს მოწოდება ხალხისა, იმიტომ, რომ გვახვევთ თავზე. თქვენ ახალისებთ გარყვნილებას, თქვე მოძალადეებო, თქვენ უწევთ პროპაგანდას თითოეული. თქვენ გარდააცვალეთ, თქვენზეა მაგ პასუხისმგებლობა. ხალხის იმებს ეხებით, იცით და წირავთ, თქვენ ხართ პასუხისმგებელი მაგის მკვლელობაზე. რატომ აკეთებთ ამას. რატომ გვილახავთ ღირსებას, უმრავლესობას რატომ გვილახავთ. უმრავლესობაზე ძალადობთ, თქვე მოძალადეებო. თქვენს სახელს ჩვენ ნუ გვარქმევთ. თქვენ ხართ ეგი, გამიგე? აბსოლუტურად. დაიმსახურეთ [ცემა]. თქვენ მოგწონთ რომ ძალადობთ ჩვენზე? ნუ ატრიალებთ ტეხნიკურად. პი-პი-პიპ. ხელით გეხები კი არა, დავაპიპინე", — ამბობს სასულიერო პირი ჟურნალისტებთან.

აღსანიშია, რომ მეუფე ანტონი სასულიერო პირების ნაწილის მსგავსად ჟურნალისტების მიმართ აგრესიით გამოირჩევა.

7 მაისს მან მთავარი არხის ჟურნალისტ ირაკლი ვაჩიბერაძეს პროფესიული საქმიანობის შესრულებისას ფიზიკური და სიტყვიერი შეურაცხყოფა მიაყენა. ტელეკომპანიის მიერ გავრცელებულ კადრებში ჩანს, რომ ინტერვიუსთვის მისულ ჟურნალისტს მეუფე ანტონი აგრესიით ხვდება და მოუწოდებს, რომ ადგილი დატოვოს. მოგვიანებით კი მიტროპოლიტი ვაჩიბერაძეს ხელი დაარტყა.

მიტროპოლიტ ანტონის გაღიზიანება მოჰყვა ჟურნალისტის კითხვას 6 მაისს, ურბნელი მიტროპოლიტი იობის რეზიდენციაში მომხდარ შემთხვევასთან დაკავშირებით, როცა ერთ-ერთ სასულიერო პირს ფიზიკურად დაუპირისპირდნენ.