რამდენიმე დღის წინ ინტერნეტსივრცე კარლოს ფრესკოსა და მისი 10 წლის ცუგას, მონტის სევდიანმა ისტორიამ აალაპარაკა. მონტი ვერაგ დაავადებას — ლეიკემიას 18 თვის განმავლობაში უდიდესი ძალისხმევის ფასად ებრძოდა. თავდაპირველად მკურნალობა კარგად მიდიოდა, თუმცა დაავადება მალე დაბრუნდა და მონტი ძალიან დაასუსტა. მონტის პატრონმა, კარლოს ფრესკომ გადაწყვიტა, ერთგული მეგობრისთვის უკანასკნელი მოგზაურობა ეჩუქებინა.

ფოტო: Brecon Radnor

კარლოსი და მონტი უელსში დასასვენებლად თავიანთ საყვარელ ადგილას წავიდნენ, სადაც ერთხელ უკვე დრო მშვენივრად გაატარეს. კარლოსი და მონტი უელსის ერთ-ერთ მთაზეც ავიდნენ. დასვენების დროს დასუსტებულ ცუგას პატრონი და მისი მეგობრები ურიკით ასეირნებდნენ.

ფოტო: Brecon Radnor

"მიუხედავად იმისა, რომ სუსტად იყო, ძალიან სიამოვნებდა ის აურზაური და ყურადღება, რომელსაც კეთილისმსურველებისგან იღებდა...სრულიად უცხო ადამიანები მეკითხებოდნენ, თუ შეიძლებოდა, რომ ურიკით მონტის უკანასკნელ გასეირნებაში დამხმარებოდნენ. მონტის გამო უამრავმა უცხო ადამიანმა იტირა, რადგან ჩვენი პატარა ოთხფეხა მეგობრები ყველას ძალიან გვიყვარს", — ამბობს კარლოსი.

ფოტო: Brecon Radnor

სამწუხაროდ, მამაცი და ერთგული მონტი 21 ივნისს საყვარელ ოჯახს სამუდამოდ გამოეთხოვა.

"ეს პატარა არსება უამრავი ადამიანის ცხოვრებას შეეხო. თითოეული ადამიანი, რომელსაც კი ოდესმე შეხვედრია, გააღიმა და გაახსენა, რომ ხანდახან ცხოვრება არც ისე ცუდია", — ამბობს კარლოსი.