5 ივლისს ძალადობრივ კონტრაქციაზე ჰომოფობიური ჯგუფების მიერ სასტიკად ნაცემი TV პირველის ოპერატორის, ალექსანდრე ლაშქარავას გარდაცვალების ფაქტს მსოფლიო მედია, მათ შორის — BBC და The Guardian ეხმაურებიან.

"5 ივლისს თბილისში მომხდარი თავდასხმის დროს ლექსო ლაშქარავამ სახის არეში რამდენიმე მძიმე დაზიანება მიიღო, თუმცა საავადმყოფოდან გამოწერეს. ის კვირას გარდაცვლილი იპოვეს", — ვკითხულობთ BBC-ის სტატიაში.

სტატიაში ნათქვამია, რომ ალექსანდრე ლაშქარავა ერთ-ერთი იყო იმ 50-ზე მეტ ჟურნალისტს შორის, რომელსაც 5 ივლისს თავს დაესხნენ.

"პრემიერმინისტრმა ირაკლი ღარიბაშვილმა ლაშქარავას გარდაცვალებას 'წარმოუდგენელი ტრაგედია' უწოდა, თუმცა ახლა მის გადადგომას ითხოვენ. მედიის წარმომადგენლები მას და მთავრობას ჟურნალისტების წინააღმდეგ ძალადობრივი კამპანიის ორკესტრირებაში ადანაშაულებენ", — წერია BBC-ის სტატიაში.

სტატიის მიხედვით, აღნიშნული ლგბტ მარშის წინააღმდეგ ძალადობის პირველი შემთხვევა არაა და ნახსენებია 2019 წელს ფილმის და ჩვენ ვიცეკვეთ პრემიერა, რომელმაც ულტრამემარჯვენეების პროტესტის ფონზე ჩაიარა.

"ქართველი ოპერატორი ულტრამემარჯვენე, ანტი ლგბტქ ჯგუფის თავდასხმის შემდეგ გარდაიცვალა" — ამ სათაურით ეხმაურება მიმდინარე მოვლენებს The Guardian. 11 ივლისს გამოქვეყნებულ სტატიაში ისიცაა ნახსენები, რომ აქტივისტებმა საპროტესტო აქცია ირაკლი ღარიბაშვილის გადადგომის მოთხოვნით დააანონსეს.

"ღარიბაშვილი ოპოზიციისა და უფლებადამცველების კრიტიკის ობიექტი მას შემდეგ გახდა, რაც ის პრაიდის მარშის ჩატარებას შეეწინააღმდეგა და დაახასიათა, როგორც 'საქართველოს მოსახლეობის უმრავლესობისთვის მიუღებელი", — ვკითხულობთ სტატიაში.

BBC-ის მსგავსად, The Guardian-ის სტატიაშიცაა ნახსენები 2019 წელს ლევან აკინის ფილმის პრემიერის პარალელურად მიმდინარე აქციები, რომლის დროსაც რამდენიმე ადამიანი დაშავდა.

ალექსანდრე ლაშქარავას გარდაცვალებას სხვა საერთაშორისო მედიებიც ეხმაურებიან, მათ შორის, Reuters და Deutsche Welle.

ალექსანდრე ლაშქარავა გუშინ, 11 ივლისს, დედამ სახლში გარდაცვლილი იპოვა. იგი ერთ-ერთია იმ ათობით მედიის წარმომადგენელს შორის, რომელსაც 5 ივლისს ძალადობრივი კონტრაქციის მონაწილეები ფიზიკურად გაუსწორდნენ. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები. იგი რამდენიმე დღე საავადმყოფოში იმყოფებოდა და 10 ივლისს სახლში გაეწერა.