"გადადგეს მკვლელი მთავრობა" — ამ მოთხოვნით დღეს, 18:00 საათზე, პარლამენტთან აქცია მოძრაობა სირცხვილიამ დააანონსა.

აქცია მას შემდეგ დაიგეგმა, რაც ცნობილი გახდა, რომ 5 ივლისის ძალადობრივი კონტრაქციის დროს, სასტიკად ნაცემი TV პირველის ოპერატორი, ალექსანდრე ლაშქარავა გარდაიცვალა. ლაშქარავას და ჟურნალისტ მირანდა ბაღათურიას თავს სწორედ სირცხვილიას ოფისში შეჭრის მცდელობისას დაესხნენ.

აქციის მოთხოვნებია:

  • ირაკლი ღარიბაშვილის მთავრობის დაუყოვნებლივ გადადგომა;
  • ყველა იმ მოძალადის დაკავება და კანონის სრული სიმკაცრით დასჯა, რომლებიც 5-6 ივლისს თავს ესხმოდნენ ადამიანებს, ასევე, ძალადობრივი აქციის ორგანიზატორების პასუხისმგებლობაში მიცემა.

ალექსანდრე ლაშქარავა ერთ-ერთია იმ ათობით მედიის წარმომადგენელს შორის, რომელსაც 5 ივლისს ძალადობრივი კონტრაქციის მონაწილეები ფიზიკურად გაუსწორდნენ. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები.

იმ ათობით ადამიანიდან, რომლებიც მოძრაობა სირცხვილიას ოფისში შეჭრას ცდილობდნენ და TV პირველის გადამღებ ჯგუფს თავს დაესხნენ, ჯერჯერობით მხოლოდ ორია დაკავებული. აკაკი ნაკაშიძისა და თორნიკე დავლაშელიძის სასამართლო პროცესი 9 ივლისს გაიმართა და მათ აღკვეთის ღონისძიების სახით პატიმრობა შეეფარდათ. დაცვის მხარე ითხოვდა მათ გათავისუფლებას 2 000-2 000 ლარიანი გირაოთი.