მსოფლიოში პირველად, ბრიტანეთის ერთ-ერთი ზოოპარკი სპილოებს გაათავისუფლებს და ველურ ბუნებაში დააბრუნებს. ზოოპარკის ბინადარი 13 სპილო, თვითმფრინავით 7 ათასი კილომეტრის გავლის შემდეგ კენიაში, ველურ ბუნებაში დასახლდება.

13 სპილოდან 12 ინგლისშია დაბადებული, 1 — ისრაელში. ველურ ბუნებაში აქამდე არც ერთ მათგანს არ უცხოვრია. სპილოები, რომელთა საერთო წონა 25 ტონას აღწევს, ახალ სახლში თვითმფრინავით გაემგზავრებიან. ისინი მგზავრობისას განცალკევებულ ვოლიერებში იქნებიან და მათ ვეტერინარები დააკვირდებიან.

პროექტის ერთ-ერთი ორგანიზატორი ასპინალის ფონდი — ცხოველებისა და ეკოსისტემების კონსერვაციის მიზნით შექმნილი ორგანიზაციაა. აღნიშნული პროექტი ეკოსისტემების აღდგენასა და თავდაპირველ მდგომარეობაში დაბრუნებას ისახავს მიზნად, რაც ცხოველებისთვის ველური ბუნებისა და სამშობლოს ხელახლა გაცნობასაც მოიცავს.

"როგორც ასეთი მასშტაბის სხვა ნებისმიერი კონსერვაციის პროექტის შემთხვევაში იქნებოდა, აქაც დიდი რისკებია, თუმცა ვთვლით, რომ რისკზე წასვლა ღირს იმისთვის, რომ ეს საოცარი სპილოები დავაბრუნოთ ველურ ბუნებაში — იქ, სადაც მათი ადგილია", — ამბობს დემიენ ასპინალი, ფონდის თავმჯდომარე.

აღსანიშნავია, რომ ორგანიზაციას ცხოველების ველურ ბუნებაში დაბრუნების პროექტები აქამდეც განუხორციელებია და თითოეული მათგანი წარმატებული აღმოჩნდა. შარშან ორგანიზაციამ სამხრეთ აფრიკაში ორი ავაზა გაუშვა.

იმედია, სპილოები ახალ სახლს წარმატებით შეეგუებიან და ველურ ბუნებაში თავისუფლებით დატკბებიან.