დღეს, 6 ივლისს, საღამოს 8 საათზე მოქალაქეები პარლამენტთან მდუმარე აქციას უერთდებიან, რომელიც გირჩი — მეტი თავისუფლების ლიდერმა, ზურაბ ჯაფარიძემ დააანონსა. დღევანდელი აქცია 5 ივლისს ჰომოფობიური და ძალადობრივი ჯგუფების კონტრაქციას ეხმაურება, რომლის შედეგადაც თბილისი პრაიდის მიერ დაგეგმილი ღირსების მარშის ჩაიშალა და 50-ზე მეტი ჟურნალისტი დაშავდა. მდუმარე აქციას ფერადი და მუსიკის მოყვარული Mzesumzira-ც უერთდება.

"დღეს თუ ჩვენ ვერ მოვერევით საკუთარ თავს და არ დავდგებით იმ განსხვავებებზე მაღლა, რომელიც ერთმანეთისგან გვაშორებს, მაშინ ვერც მოძალადეებისგან მოვთიხოვთ ვნებების გვერდზე გადადებას და საკუთარ თავზე მაღლა ახტომას", — ვკითხულობთ მზესუმზირას ფეისბუქ გვერდზე.

მზესუმზირა მოქალაქეებს მოუწოდებს, რომ დღევანდელ მდუმარე აქციაზე მოსვლით დაამტკიცონ, რომ საზოგადოება არა მოძალადე, არამედ — სოლიდარულია.

"ძვირფასო მოცეკვავეებო, მეგობრებო, პარტნიორებო, მოგიწოდებთ შევქმნათ ერთობის ისეთი პრეცედენტი, სადაც ერთმანეთისგან უამრავი რამით განსხვავებული ადამიანი თუ ბიზნესი ერთად დგას სამართლიანი და თანასწორი სახელმწიფოს შენების იდეის ქვეშ. ამიტომ დღეს, 8 სააათზე, შევირიბოთ პარლამენტის წინ, რათა დავამტკიცოთ, რომ ქართული საზოგადოება არა მოძალადე, არამედ სოლიდარულია", — ვკითხულობთ მზესუმზირას ფეისბუქ გვერდზე.

აღსანიშნავია, რომ მზესუმზირა 5 ივლისის ღირსების მარშს აქტიურად უჭერდა მხარს და გუშინდელი მოვლენების შემდეგ, თბილისი პრაიდსა და დაზარალებულ ადამიანებს სოლიდარობა საჯაროდ გამოუცხადა.

ჰომოფობიური და ძალადობრივი ჯგუფების კონტრაქციაზე მედიის 50-ზე მეტი წარმომადგენელი დაშავდა. მათ თავს ძალადობრივი ჯგუფები დაესხნენ და ტექნიკაც დაუზიანეს. ჟურნალისტების ნაწილი მძიმე დაზიანებებით საავადმყოფოშია გადაყვანილი.

შინაგან საქმეთა სამინისტრომ დღის ბოლოს დაკავებულების შესახებ ინფორმაცია გაავრცელა. უწყებაში ამბობენ, რომ ძალადობის შემთხვევა 55 პირის მიმართ გამოვლინდა, ამათგან 53 სხვადასხვა მედიასაშუალების წარმომადგენელია. რაც შეეხება დაკავებულებს, ადმინისტრაციული წესით 8 ადამიანის დაკავების შემდეგ, შსს-მ 6 ივლისს კიდევ 3 ადამიანის დაკავების შესახებ განაცხადა. შსს-ს ინფორმაციით, ისინი მედიის წარმომადგენლების მიმართ განხორციელებული ფიზიკური ძალადობისა და ძალადობის მუქარით პროფესიულ საქმიანობაში უკანონოდ ხელის შეშლის ფაქტზე არიან დაკავებულები.

თბილისი პრაიდის კვირეული დღეს, 5 ივლისს ღირსების მარშით უნდა დასრულებულიყო, თუმცა თბილისი პრაიდმა დაგეგმილი მარში გააუქმა. აქამდე კვირეულის ფარგლებში კინოჩვენება და ფესტივალი ჩატარდა, რომლის ჩაშლა ჰომოფობებმა სცადეს, თუმცა არ გამოუვიდათ. ორივე შემთხვევაში პერიმეტრს პოლიცია იცავდა.