ტოკიოში, მსოფლიოში ყველაზე ხალხმრავალ შინჯუკუს სადგურთან მდებარე ერთ-ერთ ბილბორდში გიგანტური ჭრელი კატა დასახლდა. დღეში რამდენიმე წუთის განმავლობაში ის გამვლელებს ათვალიერებს და კნავის. ჭრელი ფისო ძალიან ბუნებრივად იქცევა და მისი ზომა რომ არა, ვერასდროს იფიქრებდით, რომ თქვენ წინ არა ნამდვილი, არამედ — სამგანზომილებიანი კატაა.

ახალი ეკრანი შენობის 3 სართულს მოიცავს და მნახველებს საოცარ სანახაობას სთავაზობს. გამოსახულება იმდენად რეალურია, რომ სამგანზომილებიანი კატის დანახვისას წამით იმის შიშიც კი შეგიპყრობს, რომ ცელქი ცხოველი ბილბორდიდან ისკუპებს.

ჭრელი კატის ოფიციალური დებიუტი ეკრანზე 12 ივლისს შედგება. კატა დილის 7 საათზე ეკრანთან ერთად გაიღვიძებს, ღამის 1-ლ საათზე კი დაგვემშვიდობება და დასაძინებლად წავა. საბედნიეროდ, ფისო დროდადრო დღის განმავლობაშიც გამოჩნდება.

თუ ტოკიოში არ ხარ და კატის დანახვა ძალიან გინდა, შეგიძლია, ეკრანს ონლაინ ადევნო თვალი და გიგანტური ცხოველის გამოჩენას მოთმინებით დაელოდო.