სახალხო დამცველი, ნინო ლომჯარია მოუწოდებს შინაგან საქმეთა სამინისტროს, დროულად დაიწყოს იმ პირების იდენტიფიცირება, ვინც ჟურნალისტებზე და მშვიდობიან მოქალაქეებზე ძალადობდნენ.

"მინდა მივმართო შინაგან საქმეთა სამინისტოს, რომ დაუყოვნებლივ, დღესვე დაიწყონ აღნიშნული ვიდეომასალის გაშიფრვა და იდენტიფიცირება იმ ადამიანების, მშვიდობიან მოქალაქეებზე ვინც ძალადობდნენ, ჟურნალისტებზე და უახლოეს პერიოდში მოგვაწოდონ ინფორმაცია, თუ რა ღონისძიებები გაატარეს ამ ადამიანების იდენტიფიცირებისთვის და სისხლისსამართლებრივ პასუხისგებაში მიცემისთვის", — განაცხადა ნინო ლომჯარიამ.

სახალხო დამცველის შეფასებით, ჟურნალისტების მუშაობა ჰომოფობიური და ძალადობრივი ჯგუფების მიერ ორგანიზებულ აქციაზე იყო სამოქალაქო გმირობა.

"მინდა ჩემი სოლიდარობა, ჩემი მხარდაჭერა გამოვუცხადო ჟურნალისტებს, რომლებიც სამოქალაქო გმირობას ჩადიოდნენ დღეს და საკუთარი სიცოცხლის და ჯანმრთელობის რისკის ფასად აშუქებდნენ რუსთაველის გამძირზე და მის გარშემო მიმდინარე მოვლენებს. დღეს ჟურნალსტები იყვნენ უფლებადამცველები, რომელთა გმირულმა მუშაობამ ადგილზე უზრუნველყო ის რომ ... პრევენცია გაუკეთა თუნდაც უარესი მოვლენების განვითარებას და ასევე ძალიან მნიშვნელოვანი მოვლენების დოკუმენტირება, ძალადობრივი ქმედებების დოკუმენტირება მოახდინეს დღეს ჟურნალისტებმა", — განაცხადა ნინო ლომჯარიამ.

სახალხო დამცველის შეფასებით, დღეს, რუსთაველზე და მიმდებარე ტერიტორიაზე ჟურნალისტების მიმართ განხორციელებული ძალადობა წახალისებულია წინა წლებში მომხდარი მსგავსი შემთხვევების უგულებელყოფით.

ძალადობრივი ჯგუფების მიერ ორგანიზებული აქციის მონაწილეები დილიდან ფიზიკურად უსწორდებიან მედიის წარმომადგენლებს. მათ სცემეს, ტექნიკა დაუზიანეს და პროფესიულ საქმიანობაში ხელი შეუშალეს ფორმულას, TV პირველის, მთავარი არხის, რადიო თავისუფლებისა და სხვა მედიების ჟურნალისტებსა და ოპერატორებს. ჰომოფობიური და ძალადობრივი კონტრაქციის მონაწილეები On.ge-ს ჟურნალისტსაც დაუპირისპირდნენ.

ჟურნალისტებზე ძალადობის ფაქტებზე პასუხისმგებლობის აღებას არ აპირებს საპატრიარქო, რომელმაც Tbilisi Prideს-ს წინააღმდეგ აქცია დაგეგმა.

სახალხო დამცველმა, ნინო ლომჯარიამ ჟურნალისტების მუშაობას სამოქალაქო გმირობა უწოდა, მისი თქმით, ჟურნალისტების მუშაობამ "პრევენცია გაუკეთა უარესი მოვლენების განვითარებას".