ჯანდაცვის მინისტრის მოადგილე, თამარ გაბუნია ამბობს, რომ კორონავირუსის საწინააღმდეგო ვაქცინების მწარმოებელ Moderna-სთან და Johnson & Johnson-თან მოლაპარაკებები დაიწყეს თუმცა შედეგს ვერ მიაღწიეს.

"მათი მიღების შესაძლებლობა გვაქვს კოვაქსის პლატფორმის საშუალებით. პირდაპირი მოლაპარაკებები Moderna-სთან და Johnson & Johnson-თან დავიწყეთ, თუმცა ეს შემდეგ აღარ განვითარდა, რადგან არ იყო გარკვეული პირობები ჩვენთვის მისაღები", — აღნიშნა გაბუნიამ.

კითხვაზე, რა პირობები იყო მიუღებელი სახელმწიფოსთვის მინისტრის მოადგილე პასუხობს:

"ამ შემთხვევაში მნიშვნელოვანია ფასის გათვალისწინება, მოწოდების ვადების გათვალისწინება, რადგან დრო მნიშვნელოვანი ფაქტორია. ყველაფერი ამის გათვალისწინებით არჩევანი გაკეთდა იმ ვაქცინებზე, რომელიც დღეს ქვეყანაში არის".

პირველ ივლისს საქართველოში ჩინური ვაქცინის მილიონი დოზა შემოვიდა. მთავრობაში აცხადებდნენ, რომ ორშაბათიდან, 5 ივლისიდან ქვეყანაში მასობრივი ვაქცინაცია დაიწყებოდა. თუმცა ვაქცინის დაჯავშნის პორტალი ხარვეზებით მუშაობს.

Sinopharm-ისა და Sinovac-ის ახალ დოზაზე რეგისტრაცია 3 ივლისს, 12:00 უნდა დაწყებულიყო, ვებგვერდი რამდენიმე საათის განმავლობაში გათიშული იყო. პორტალი ახლა ჩართულია, თუმცა რეგისტრაცია მაინც რთულდება.

ჯანდაცვის მინისტრის მოადგილემ, თამარ გაბუნიამ გუშინვე განაცხადა, რომ პორტალზე კიბერშეტევა განხორციელდა. შინაგან საქმეთა სამინისტრომ გამოძიება ორი მუხლით დაიწყო — სისხლის სამართლის კოდექსის 285-ე და 286-ე მუხლებით, რაც კომპიუტერული მონაცემის, ანდა კომპიუტერული სისტემის უკანონოდ გამოყენებასა და ხელყოფას გულისხმობს.