მთავრობის ადმინისტრაციის ყოფილი უფროსი და პარტია საქართველოსთვის წევრი, ნათია მეზვრიშვილი აცხადებს, რომ გიორგი თაბაგარი ცრუობს და 2019 წელს პოლიციამ ძალადობა არ დაუშვა.

"პირველ რიგში, დავიწყოთ იმით, რომ ძალიან არ მინდა, რომ ეს ვთქვა, მაგრამ მიწევს, ბატონ გიორგი თაბაგარს ვგულისხმობ, ცრუობდა უბრალოდ ამ ინტერვიუში იმიტომ, რომ ვერ მაჩვენებთ ვერცერთ ფაქტს, როდესაც პოლიციამ მაშინ, როდესაც ჩვენ ვიყავით შინაგან საქმეთა სამინისტროში, ძალადობა ან დაუშვა და იქ, სადაც ძალადობა მოხდა, პოლიციისგან დამოუკიდებელი მიზეზების გამო დაუყოვნებლივ არ აღკვეთა. ძალიან სამწუხაროა, რომ ამას ამბობს, მე გასაგებია, რომ არ მინდა პატარა დეტალებში შევიდე, ჩვენ როდესაც ვიყავით შინაგან საქმეთა სამინისტროში, პირველად შინაგან საქმეთა სამინისტროს ისტორიაში, რომელიც არის საკმაოდ დახურული უწყება, მოგეხსენებათ სამართალდამცავი სისტემა, ზოგადად, დახურულობით, ნაკლები ღიაობით გამოირჩეოდა ყოველთვის. ჩვენ შევქმენით ადამიანის უფლებათა დაცვის დეპარტამენტი, რომლის ერთ-ერთი მთავარი ამოცანა, სხვა კატეგორიის დანაშაულების წინააღმდეგ ბრძოლასთან ერთად, ერთ-ერთი მთავარი ამოცანა გახლდათ დისკრიმინაციის წინააღმდეგ ეფექტიანი ბრძოლა, დისკრიმინაციული მოტივებით ჩადენილი დანაშაულის წინააღმდეგ", — აცხადებს მეზვრიშვილი ფორმულას ეთერში.

ღირსების მარში თბილისში პირველად 2019 წლის ივლისში გაიმართა. ჰომოფობიურმა და ძალადობრივმა ჯგუფებმა მისი ჩაშლა მაშინაც სცადეს, თუმცა მარში მაინც ჩატარდა. ამ დროს ნათია მეზვრიშვილი შინაგან საქმეთა მინისტრის მოადგილე იყო. როგორც თბილისი პრაიდის ორგანიზატორი, გიორგი თაბაგარი აცხადებს 2019 წელს სიტუაცია ბევრად მძიმე იყო, ვინაიდან სახელმწიფოსთან ნაკლები თანამშრომლობა იყო, უშუალოდ მარშის დღის კი შინაგან საქმეთა სამინისტროსგან მიიღეს შეტყობინება, რომ მათ არ დაიცავდნენ.