ნორვეგიაში მიიღეს ახალი კანონი, რომლის თანახმადაც, ინფლუენსერებსა (სოციალურ მედიაში პოპულარულ ადამიანებს, რომლებიც სხვადასხვა მასალის განთავსებით შოულობენ ფულს) და სარეკლამო სფეროში ჩართულ ადამიანებს მოუწევთ, რომ დამუშავებულ ფოტოებს ინტერნეტში გამოქვეყნებისას შესაბამისი მითითება გაუკეთონ.

შეზღუდვას მხარი 72 კანონმდებელმა დაუჭირა 15-ის წინააღმდეგ. ნორვეგიის მეფე მოგვიანებით გამოაცხადებს, თუ როდიდან ამოქმედდება კანონი ქვეყანაში.

ამ ახალი წესის თანახმად, სარეკლამო ფოტოებს, რომლებშიც სხეულის ფორმა, ზომა ან სხვა დეტალები დამუშავებული იქნება (მათ შორის, ფილტრით), ბავშვებისა და ოჯახური საკითხების სამინისტროს მიერ შემუშავებული სტანდარტული მინიშნება უნდა გაუკეთდეს, რომ კონკრეტულ ფოტოზე სხეული არარეალისტურადაა წარმოჩენილი. მაგალითებში განხილულია დავიწროებული წელი, გადიდებული ტუჩები და გაზრდილი კუნთები, თუმცა ჯერ დაზუსტებული არ არის, შეზღუდვა იმოქმედებს თუ არა ფერებისა და განათების ცვლილებაზეც.

კანონი ასევე გავრცელდება ყველა იმ ცნობილ სახეზე, რომლებიც "ნებისმიერ ფინანსურ მოგებას ან სხვა სარგებელს" იღებენ ისეთ სოციალურ მედიაში გამოქვეყნებული პოსტებით, როგორებიც Facebook, Instagram, Snapchat, TikTok და Twitter-ია. დარღვევის გამოვლენისას დაწესდება ფინანსური ჯარიმა, განსაკუთრებით მძიმე შემთხვევებში კი პატიმრობაც განიხილება.

ნორვეგიის სახელმწიფომ ეს ნაბიჯი მას შემდეგ გადადგა, რაც ბოლო წლებში აქტიურად დაიწყო საზოგადოებრივი განხილვები სოციალურ ფენომენზე, რომელსაც ნორვეგიაში kroppspress-ს ("სხეულზე ზეწოლა") უწოდებენ. ჩატარებული კვლევებით აღმოჩნდა, რომ სილამაზის სტანდარტები თვითშეფასებას აზიანებს და ტრავმულ შედეგებს ტოვებს განსაკუთრებით ახალგაზრდა ადამიანებში.

"სხეულზე ზეწოლას ვგრძნობთ სამსახურებში, სამუშაო სივრცეში, შინ, მედიასა და სხვაგან. ეს ზეწოლა ყოველთვის იგრძნობა, მაგრამ ხშირად შეუმჩნეველია, რაც მასთან ბრძოლას ართულებს", — წერია ბავშვებისა და ოჯახის სამინისტროს განცხადებაში, რომლითაც პარლამენტს კანონის მიღების მოთხოვნით მიმართეს.

აღსანიშნავია, რომ ამ თემაზე ბოლო პერიოდში მთელ მსოფლიოში მწვავე განხილვები მიმდინარეობს. ამის შედეგად, საფრანგეთში 2017 წელს მიიღეს კანონი, რომელიც მოდის ჟურნალებს ავალდებულებს, რომ დამუშავებულ ფოტოებს შესაბამისი მითითება წაუმძღვარონ. ასევე ვიზუალური მედიის ერთ-ერთმა ყველაზე დიდმა კომპანიამ Getty Images თავისი ბაზიდან ამოიღო მოდელების დამუშავებული ფოტოები.