საქართველოს სახალხო დამცველი, უჩა ნანუაშვილი მიიჩნევს, რომ რუსთავი 2-ის საქმეზე საქართველოს უზენაესი სასამართლოს გადწყვეტილების აღსრულებით, შესაძლოა, საფრთხე დაემუქროს ქვეყანაში მრავალფეროვანი მედია გარემოს შენარჩუნებას, განსაკუთრებით კი კრიტიკული მედია საშუალების ფუნქციონირებას.

ნანუაშვილის შეფასებით, შესაძლოა, რომ საკასაციო სასამართლოში საქმის ზეპირი მოსმენის გარეშე განხილვამ უარყოფითი გავლენა იქონია საზოგადოების ნდობაზე სასამართლოში მიმდინარე პროცესის მიმართ.

"რუსთავი 2-ის კუთვნილებასთან დაკავშირებული მთელი პროცესი სამართლებრივი გზით სრულყოფილად არ შეფასებულა, ხოლო, მეორე მხრივ, არსებობს კითხვის ნიშნები, შესაძლებელი იქნება თუ არა ხელისუფლებისადმი კრიტიკულად განწყობილი ტელეარხის შენარჩუნება, სამართლიანობის სრულყოფილად აღდგენის განცდის არარსებობასთან ერთად, შესაძლოა მივიღოთ მედია მრავალფეროვნების დაკარგვა, რაც უდავოდ უკანგადადგმული ნაბიჯი იქნება ქვეყანაში გამოხატვისა და სიტყვის თავისუფლების მაღალი სტანდარტის შენარჩუნებისთვის," - აღნიშნავს ნანუაშვილი.

მისი თქმით, ბოლო წლებში, საზოგადოების მონაპოვარი მედია თავისუფლება და მრავალფეროვანი მედია გარემოს არსებობა იყო, რაც დემოკრატიული სახელმწიფოს ერთ-ერთი მნიშვნელოვანი საფუძველია. თუმცა, სახალხო დამცველს მიაჩნია, რომ ბოლო დროს საქართველოს მედიასივრცეში მიმდინარე მოვლენებმა, შესაძლოა, ეჭქვეშ დააყენოს ეს მიღწევები.

2 მარტს საქართველოს უზენაესი სასამართლოს გადაწყვეტილებით, ტელეკომპანია რუსთავი 2-ის წილების მფლობელი გიორგი და ლევან ყარამანიშვილების, ნინო ნიჟარაძისა და შპს ტელეკომპანია საქართველოს ნაცვლად, ქიბარ ხალვაში და მისი კომპანია - შპს პანორამა გახდნენ.