შარლ მიშელის რეფორმების ჯგუფი და ლელო — პარტნიორობა საქართველოსთვის NATO-ში საქართველოს გასაწევრიანებლად მიზნობრივი საერთაშორისო საპარლამენტო პლატფორმის შექმნის ინიციატივით გამოდის. ამასთან დაკავშირებით მათ დღეს საგანგებო მემორანდუმი გააფორმეს, რათა ერთობლივი ძალისხმევა მიმართული იყოს NATO-ში წევრობისკენ.

მემორანდუმში აღნიშნულია, რომ საქართველომ და უკრაინამ NATO-ში გაწევრიანება დასახა ეროვნული უსაფრთხოების და დემოკრატიის გაძლიერების საფუძვლად. ორი ქვეყნის ევროატლანტიკური მისწრაფებები ასახულია სახელმწიფოთა კონსტიტუციებში. ორივე ქვეყანას გააჩნია NATO-ს 2008 წლის ბუქარესტის დეკლარაციის დაპირება, რომ გახდებიან ორგანიზაციის წევრები. შესაბამისად, აცხადებენ, რომ საქართველომ მაქსიმალური ძალისხმევა უნდა მიმართოს გაწევრიანებისკენ.

ამისთვის კი მათ საგანგებო მემორანდუმი შეიმუშავეს, სადაც მიზნის მისაღწევად შემდეგი ღონისძიებებია დასახული:

  • საპარლამენტო დონეზე შევიმუშაოთ ერთობლივი სამოქმედო გეგმა. სამოქმედო გეგმის შემუშავების მიზნით ვაწარმოებთ აქტიურ კომუნიკაციას, როგორც მეგობარ ქვეყნებთან, ასევე შესაბამის საერთაშორისო ორგანიზაციებთან. პროცესში ჩასართავად მოვიწვევთ ქართველ და უკრაინელ დეპუტატებს, ისევე, როგორც NATO-ს ასპირანტი და წევრი ქვეყნების არასამთავრობო ორგანიზაციებისა და აკადემიური წრეების წარმომადგენლებს;
  • ინიციატივის ფარგლებში ჩვენ დავიწყებთ საერთო ეროვნულ განხილვებს, რათა ყველას მიეცეს პროცესში ჩართულობის შესაძლებლობა. პერიოდულად ინტერფრაქციულ სამუშაო ფორმატში ფართო საზოგადოების ჩართულობით განვიხილავთ პროგრესს NATO-ში გაწევრიანების გზაზე;
  • განვახორციელებთ საპარლამენტო ზედამხედველობას აღმასრულებელ ხელისუფლებაზე, რათა უზრუნველყოფილი იყოს, NATO-ს სტანდარტების შესრულება ჩვენიქვეყნების დემოკრატიული განვითარების, კანონის უზენაესობისა და თავდაცვის სფეროში NATO-თან თავსებადობის ხარისხის ასამაღლებლად;
  • ძალისხმევას არ დავიშურებთ, რათა საქართველოსა და უკრაინის NATO-ში გაწევრიანების საკითხი მუდმივად იყოს NATO-ს მაღალი ოფიციალური შეხვედრების დღის წესრიგში.

მემორანდუმს ხელს საპარლამენტო ფრაქციები შარლ მიშელის რეფორმების ჯგუფი და ლელო — პარტნიორობა საქართველოსთვის აწერენ. ამასთან, როგორც აცხადებენ, პროცესი ღია და გახსნილი იქნება ყველა დაინტერესებული მხარისათვის.