29 ივნისს მაკდონალდსის ინვესტიციით საქართველოში პირველი საერთაშორისო სტანდარტების პურ-ფუნთუშეულის საწარმო — ბრედფილდი გაიხსნა. საწარმოს ოფიციალურ გახსნაში მონაწილეობა მიიღეს მაკდონალდს საქართველოს პრეზიდენტმა თემურ ჭყონიამ, საქართველოში აშშ-ის ელჩმა, კელი დეგნანმა, მაკდონალდს საქართველოს გენერალურმა დირექტორმა თენგიზ კაპანაძემ და საქართველოს ეკონომიკისა და მდგრადი განვითარების მინისტრის მოადგილემ, ირაკლი ნადარეიშვილმა.

ამ სტატიაში მოგიყვებით ათ ფაქტზე, რომელიც უახლესი საწარმოს შესახებ უნდა იცოდეთ.

1. ბრედფილდი ულტრათანამედროვე დანადგარებითაა აღჭურვილი

საწარმოში, რომლის ინვესტიციის მოცულობა 26 მილიონ ლარს შეადგენს, პროდუქციის წარმოება საერთაშორისო და მაკდონალდსის სტანდარტებით მიმდინარეობს, ამასთან საწარმოს ულტრათანამედროვე ტექნოლოგიებსა და დანადგარებს რეგიონში ანალოგი არ გააჩნია.

2. ბრედფილდი მომხმარებლებს მრავალფეროვან ასორტიმენტს სთავაზობს

ბრედფილდის საწარმოში ბურგერების პურის გარდა სხვადასხვა სახის პურ-ფუნთუშეულიც მომზადდება. გამორჩეული გემოსა და არომატის მქონე პროდუქტებით ბრედფილდი ქართულ ბაზარზე პურის ცხობის ახალ, საერთაშორისო სტანდარტებს დაამკვიდრებს და მომხმარებლებს გამორჩეულ, მუდმივად ახალ პურ-ფუნთუშეულს შესთავაზებს.

3. ბრედფილდის პროდუქცია საცალო მარკეტებშიც გაიყიდება

ბრედფილდი პურით მოამარაგებს საქართველოში მაკდონალდსის ქსელის 18 რესტორანს, ძალიან მალე კი მისი მრავალფეროვანი პროდუქცია საცალო მარკეტებშიც გაიყიდება, რაც იმას ნიშნავს, რომ გემრიელი, ნამდვილი ბურგერების მომზადება და ნაცნობი გემოს მიღება მომხმარებლებს უკვე სახლშიც შეეძლებათ.

4. ბრედფილდი მაკდონალდსის რესტორნების რეგიონულ ჰაბს შექმნის

ბრედფილდი მომხმარებლებს უმაღლესი ხარისხის, მრავალფეროვანი ასორტიმენტის პროდუქტს როგორც საქართველოში, ისე მეზობელ ქვეყნებში შესთავაზებს. ბრედფილდი ხელს შეუწყობს ადგილობრივი ბაზრის ზრდას და იმპორტს ექსპორტით ჩაანაცვლებს. 2022 წლიდან საწარმოში დამზადებული პროდუქცია მეზობელ ქვეყნებშიც გავა და მაკდონალდსის ქსელის რესტორნებისთვის ერთგვარ რეგიონულ ჰაბს შექმნის.

5. ბრედფილდში 100 ადამიანი დასაქმდება

საწარმოში საწყის ეტაპზე — 30, წარმოების გაფართოებასთან ერთად კი 100 ადამიანი დასაქმდება. დასაქმებულთა კვალიფიკაციის ამაღლებასა და გადამზადებაზე ბრედფილდმა ავსტრიელ ექსპერტებთან დაიწყო თანამშრომლობა. ისინი საწარმოს თანამშრომლებს თეორიულ თუ პრაქტიკულ ცოდნას ადგილზე უზიარებენ.

6. ბრედფილდი მიზნად ისახავს პურის კულტურის განვითარებას

კომპანიის ერთ-ერთი მიზანი დარგის მუდმივი განვითარებაა. ბრედფილდში იციან, რომ საქართველო ღვინოსთან ერთად ხორბლის სამშობლოცაა, ამიტომაც ისინი ხორბლის ენდემური ჯიშების გაცოცხლებასა და პოპულარიზაციას გეგმავენ. გარდა ამისა ბრედფილდის მიზანი დარგში თანამედროვე სტანდარტების დანერგვის ხელშეწყობაა, რისთვისაც ის საერთაშორისო კონფერენციებსაც უმასპინძლებს.

7. ბრედფილდი გარემოზე ზრუნავს

ბრედფილდისთვის წარმოების მაღალი სტანდარტები ამოსავალი წერტილია, ხოლო გარემოზე ზრუნვა ერთ-ერთი პრიორიტეტი. აღსანიშნავია, რომ საწარმო უზრუნველყოფილია გარემოსდაცვითი აღჭურვილობით, რისი მეშვეობითაც მას გარემოზე ზემოქმედების ნული ეფექტი აქვს. ღუმელებზე დამონტაჟებულია დანადგარები, რომელთა მეშვეობით გამონაბოლქვი გარემოში არ გაიფრქვევა — ის გადამუშავდება და საწარმოში სითბოს მისაღებად გამოიყენება.

8. ბრედფილდი საგანმანათლებლო მიმართულებით იმუშავებს

საწარმო არა მხოლოდ მაღალი ხარისხის პროდუქციის შექმნაზე იქნება ორიენტირებული, არამედ საგანმანათლებლო მიმართულებითაც აქტიურად იმუშავებს. ბრედფილდში იგეგმება საგანმანათლებლო ლაბორატორიის შექმნა, სადაც სკოლის მოსწავლეებისთვის და სხვა დაინტერესებული ადამიანებისთვის სპეციალური ტურები ჩატარდება. ისინი შეძლებენ ქარხნის დათვალიერებას, პურის გამოცხობას, რაც სამომავლოდ დარგის პოპულარიზაციას შეუწყობს ხელს. ლაბორატორია, ამასთან, საგანმანათლებლო პროგრამითა და სტაჟირებით, შესაბამისი სპეციალობის მქონე სტუდენტებს კვალიფიკაციის ამაღლებაში დაეხმარება.

9. ბრედფილდი მხარს დაუჭერს მცირე ბიზნესებს

მაკდონალდსის ქსელის მომარაგების გარდა ბრედფილდი მცირე მეწარმეებზეც იზრუნებს. ის ბურგერ ბარებს, რესტორნებს და ზოგადად სტუმარ-მასპინძლობის სექტორს მათზე მორგებულ პროდუქციასაც შესთავაზებს.

10. ბრედფილდისთვის ცხობა მეცნიერებაა

ბრედფილდი პურ-ფუნთუშეულის კატეგორიაში ახალი სტანდარტების დანერგვისკენ მიისწრაფვის. ის, როგორც უკვე ვახსენეთ, საქართველოში პურის კულტურის განვითარებას შეუწყობს ხელს.

“ჩვენ გვსურს, ცხობის და პურ-ფუნთუშეულის მიმართულებით ახალი სამომხმარებლო კულტურის ჩამოყალიბებას შევუწყოთ ხელი. მსოფლიოში ახალი ტენდენციაა ბურგერების სახლში მომზადება — ჩვენ მომხმარებლებს საქმის ნახევარს ვუმარტივებთ. ჩვენ ვისწრაფვით, რომ დავნერგოთ სტანდარტი კატეგორიაში და ხელი შევუწყოთ პურის კულტურის განვითარებას საქართველოში. ჩვენთვის ცხობა მეცნიერებაა, რაც საქმისადმი განსაკუთრებულ სიყვარულს, დარგის სიღრმისეულ ცოდნას, სიახლეების მუდმივ ძიებას და მიზანსწრაფულობას გულისხმობს”, — აცხადებენ ბრედფილდში.