25 ივნისიდან გერმანიაში შესვლას შეძლებს ყველა, ვინც Pfizer, AstraZeneca, Moderna და J&J გაიკეთა. ჩამონათვალში არ შედის Sinopharm და Sinovac. საქართველოს საგარეო საქმეთა სამინისტროს განცხადებით, გარდა ე.წ. მუტაციური ვირუსის გავრცელების ქვეყნებიდან შემოსული პირებისა, კოვიდვაქცინირებულს ნებისმიერი მიზნით შეუძლიათ გერმანიაში შესვლა.

უწყების ცნობით, ვაქცინაციის ბოლო დოზის შემდეგ გასული უნდა იყოს 14 დღე. სავალდებულო არ არის PCR/სწრაფი ტესტის წარდგენა, იზოლაცია/კარანტინი და ასევე, PCR/სწრაფი ტესტის ჩატარება არ ხორციელდება არც აეროპორტში.

სამინისტროს განცხადებით, პირები, რომელებიც გერმანიაში მგზავრობამდე ბოლო 10 დღის განმავლობაში იმყოფებოდნენ რობერტ კოხის ინსტიტუტის მიერ განსაზღვრულ რისკის შემცველ, დაინფიცირების მაღალი მაჩვენებლის მქონე ან იმ ქვეყნებში, სადაც დაფიქსირებულია ვირუსის ახალი შტამი, ვალდებულნი არიან ვებ-გვერდზე გაიარონ რეგისტრაცია, სადაც ისინი მიუთითებენ მგზავრობის დეტალებს, საკონტაქტო ტელეფონს, რეისის ნომერს, გერმანიაში გაჩერების მისამართს და სხვა.

ინფიცირების მაღალი მაჩვენებლის, ვირუსის ახალი შტამისა და სხვა რისკის შემცველი ქვეყნების სია გამოქვეყნებულია რობერტ კოხის სახელობის ინსტიტუტის ვებ-გვერდზე.

საგარეოს ცნობით, ვაქცინის გარეშე გერმანიაში შესვლა მხოლოდ გამონაკლის შემთხვევებშია შესაძლებელი და ამისათვის უნდა არსებობდეს გადაუდებელი აუცილებლობა.

უწყების ინფორმაციით, შეზღუდვების შესაბამისად, გერმანიაში შესვლა შესაძლებელია გადაუდებელი აუცილებლობის შემთხვევაში შემდეგი პირებისთვის: გერმანიაში დასაქმებული პირები და მაღალკვალიფიციური პერსონალი, რომელთა დასაქმება ეკონომიკური თვალსაზრისით მნიშვნელოვანია, მათ შორის, ბიზნესვიზიტები, ამ ვიზიტის გადაუდებლობის დამადასტურებელი დეკლარაციის არსებობის შემთხვევაში.