"ეს არის არასწორი მიდგომა და მათ შორის, ეს არ არის დემოკრატიული მიდგომა, როდესაც ხდება კლიშეების მიკერება და შემდეგ ამ კლიშეებით მსჯელობა" — ასე აფასებს მმართველი გუნდის წარმომადგენელი, შალვა პაპუაშვილი, ევროპარლამენტარ ვიოლა ფონ კრამონის განცხადებას. კერძოდ, ვიოლა ფონ კრამონმა რამდენიმე დღის წინ ტვიტერზე დაპოსტა, რომ "სასამართლო სისტემაში კლანის არსებობა ანგრევს კანონის უზენაესობას".

მთავარი არხის გადაცემის წამყვანის კითხვაზე, ამ განცხადებით საყვედურობს თუ არა პაპუაშვილი ევროპარლამენტარებს, ის პასუხობს:

"კლანის ასე მიკერება არ შეიძლება, მათ შორის, ევროპარლამენტარის მხრიდან".

ამავდროულად, პაპუაშვილი აღნიშნავს, რომ ეს არ მიაჩნია ქვეყნის სუვერენინტეტში ჩარევად.

"არა, რა თქმა უნდა. ევროპარლამენტარია და თავისი შეფასებები აქვს და ამ კუთხით შეფასებებში პრობლემა არ არის. საქმე იმაშია, ამ შეფასებების უკან რა დგას", — ამბობს პაპუაშვილი.

თუმცა, მანამდე წამყვანმა ისიც ჰკითხა, ეთანხმება თუ არა პაპუაშვილი თანაგუნდელის, სოზარ სუბარის იმ განცხადებას, სადაც მან სასამართლო სისტემაზე საქართველოს პარტნიორების და მათ შორის, ელჩების შეფასებები გადაჭარბებულად შეაფასა. პაპუაშვილმა განაცხადა, რომ კი.