რაგბი ევროპის 2021 წლის ჩემპიონატის ბოლო ტურში, საქართველოს ნაკრებმა ნიდერლანდებს თელავში უმასპინძლა და 48:15 დაამარცხა.

საქართველომ ტურნირის ხუთივე მატჩი მოიგო და "დიდი სლემით" ჩემპიონი (ჩემპიონობა ყველა მატჩის მოგებით) გახდა.

დღევანდელ მატჩში საუკეთესო დავით ნინიაშვილი იყო, რომელმაც სამი ლელო დადო.

აღსანიშნავია, რომ ნიდერლანდებმა პირველ ტაიმში ძალიან კარგი შთაბეჭდილება დატოვა და რაგბი ევროპის 13-გზის ჩემპიონთან მხოლოდ 15-8 წააგო. 1995 წლის შემდეგ, "ნარინჯისფერებმა" პირველად შეძლეს საქართველოსთვის ლელოს დადება.

დღევანდელ შეხვედრაში საქართველოს ნაკრების თამაშის ხარისხი სასურველისგან შორს იყო. მატჩის შემდეგ, ამ თემას გუნდის კაპიტანიც შეეხო:

"საბოლოო ანგარიშით კმაყოფილი ვარ, მაგრამ თამაშის ხარისხი ისეთი არ იყო, როგორიც ჩვენ გვსურდა. თუმცა მატჩი მოვიგეთ, ჩემპიონები ვართ და ახლა უნდა ვიზეიმოთ", — განაცხადა მერაბ შარიქაძემ.

იმედია, 2 ივლისამდე დროს გუნდი თამაშის ხარისხის გასაუმჯობესებლად მაქსიმალურად ნაყოფიერად გამოიყენებს. შეგახსენებთ, ბორჯღალოსნები სამხრეთ აფრიკაში მიემგზავრებიან, სადაც 2 და 9 ივლისს ამხანაგურ მატჩს მსოფლიოს მოქმედ ჩემპიონთან გამართავენ. 17 ივლისს კი, თბილისში შოტლანდიას დაუპირისპირდებიან.