ნობელის პრემიის ლაურეატი, პოლონელი მწერალი ოლგა ტოკარჩუკი ნაციონალისტების მიერ განადგურებული საკუთარი წიგნების გაყიდვას და ამით ლგბტქ საქველმოქმედო ორგანიზაციების დახმარებას აპირებს.

ულტრამემარჯვენე პროტესტის მონაწილეებმა სოციალურ ქსელებში კამპანია #OdeślijOldzeKsiążkę ("დაუბრუნე წიგნი ოლგას") მას შემდეგ წამოიწყეს, რაც ტოკარჩუკმა პოლონეთის კონსერვატიული მთავრობის ქმედებები გააკრიტიკა.

იტალიურ გაზეთ Corriere della Sera-სთან ინტერვიუში ნობელიანტმა ავტორმა აღნიშნა, რომ პანდემიამ პოლონეთის მთავრობას აბორტის "ბარბაროსული" აკრძალვის წინააღმდეგ მიმართული საპროტესტო აქციების ჩახშობის საშუალება მისცა. ამის შემდეგ, ტოკარჩუკმა ბელარუსის მოვლენები გაიხსენა, როგორც პროდემოკრატიული მოძრაობების შევიწროების მაგალითი.

"ბელარუსი იმის მაგალითია, თუ როგორ უსაფრთხოდ გრძნობენ ახალ, პანდემიურ რეალობაში არსებული რეჟიმები თავს: დაშინებული საზოგადოება უფრო ადვილად ემორჩილება ბრძანებებსა და აკრძალვებს".

ამ განცხადებების შემდეგ დაიწყო კამპანია ტოკარჩუკის წიგნების განადგურების მოთხოვნით. პროტესტის მონაწილეები დაზიანებულ ეგზემპლარებს მწერალს უგზავნიან.

თუმცა, მიღებულ წიგნებს ტოკარჩუკმა დანიშნულება მოუძებნა: მისი ფონდი მათ აუქციონზე გამოიტანს გასაყიდად, მიღებული თანხით კი პოლონეთში არსებულ ლგბტქ ორგანიზაციებს დაეხმარებიან.

"სიძულვილი რთული გასაგებია", — წერს ფონდი ფეისბუქზე და პროტესტის მონაწილეებს მიმართავს, — "სირცხვილი თქვენ. როგორც დაგპირდით, ყველა წიგნი, რომელთა უმეტესობაც სრულიად დაზიანებულია, აუქციონზე გასაყიდად გავა. მიღებულ სარგებელს იმ ორგანიზაციებს გადავურიცხავთ, რომლებიც ლგბტქ უფლებებს მხარს უჭერენ. წმინდა წყლის ბოლოტების გამოხატულების გაყიდვით, იმ ადამიანების დახმარების იდეა, რომელთაც თქვენნაირი ხალხი და თქვენ მიერ მხარდაჭერილი სისტემა დევნის, უფრო ფართო დისკუსიის საგანი გახდება".