ტელეკომპანია რუსთავი 2-ის ახალი მფლობელი, ქიბარ ხალვაში ტვ პირველთან ინტერვიუში აცხადებს, რომ რუსთავი 2 მისთვის არის ზარალის ანაზღაურების საშუალება და სიცოცხლის ბოლომდე არ აპირებს ტელევიზიის ფლობას:

"მე არ ვარ ის ადამიანი, რომელსაც ტელევიზია ძალიან სჭირდება. ეს ჩემთვის არის მატერიალური ქონება და ჩემი ზარალის ნაწილის ანაზღაურების საშუალება. მე არ ვაპირებ ტელევიზიის გაყიდვას, მაგრამ არ გპირდებით, რომ მთელი ცხოვრება ტელევიზიის მფლობელი ვიქნები.

ვფიქრობ, რომ სახელმწიფო ვალდებულია კანონიერი მფლობელობა თვითონ აღასრულოს. როდესაც შეძლებს ამის მშვიდობიანად შესრულებას, მეც მაშინ შევასრულებ. მე ვფიქრობ ნერვიულობა გადაუვლის ხალხს, და რეალობას შეეჩვევიან.

როდესაც 2009 წელს აღსრულება ხდებოდა, გაცილებით მეტი თანამშრომელი დარჩა უმუშევარი ჩვენთან. ჯერ ქონება დაიტაცეს ვიღაც ვიღაცებმა, მერე ვიღაცები ჩამოვიდნენ რაიონებიდან და გაიტაცეს ტექნიკა. დაახლოებით ერთი თვის მერე მოიტანეს სასამართლოს გადაწყვეტილება და ახლოს არ მიგვაკარეს. ეს ყველაფერი ხდებოდა ჩემ წინააღმდეგ და ერთ-ერთი თანამონაწილე ამ საქმისა იყო გვარამია".

ხალვაშის თქმით მიმდინარე პროტესტი არ არის ტელეკომპანიის თანამშრომლების და კოლექტივის აზრი, არამედ "თავსმოხვეულია მათი ლიდერის, სააკაშვილის მხრიდან":

"ვფიქრობ, ცოტა ხანში ყველაფერი დაწყნარდება და ყველაფერი მშვიდობიანად ჩაივლის".

უზენაესი სასამართლოს გადაწყვეტილება დაახლოებით ერთი საათის წინ გახდა ცნობილი. სასამართლომ რუსთავი 2 ქიბარ ხალვაშსა და მის კომპანიას მიაკუთვნა.