სტრატეგია აღმაშენებლის ლიდერი, გიორგი ვაშაძე პენსიონერებთან ერთად ლიბერთი ბანკთან აქციას გეგმავს. მისი თქმით, პენსიონერებისთვის მაღალპროცენტიანი სესხების გაცემით, ლიბერთი ბანკი ძარცვავს მათ.

"პენსიონერებს მინდა ვუთხრა, ხუთშაბათს, 6 საათზე ლიბერთი ბანკთან აქციაზე ვიკრიბებით. ვაჩვენოთ ამ ადამიანებს, რომ ამათი არ არის ქვეყანა [...]

გუშინ, ჩვენ გამოვიტანეთ საპენსიო კანონი და ძალიან ბედნიერი იყო ქართული ოცნების დეპუტაცია, რომ მხარი არ დავუჭირეთო ვაშაძის კანონსო. ვაშაძის კანონი კი არ არის ის ჩემო კარგებო, ბატონო ქართული ოცნების წარმომადგენლებო, ეს არის პენსიონერების კანონი, რომ ძარცვა გაჩერდეს ლიბერთი ბანკის მხრიდან", — განაცხადა ვაშაძემ პარლამენტის პლენარულ სხდომაზე.

თემას გამოეხმაურა პარტია მოქალაქეების ლიდერი, ალეკო ელისაშვილი. მისი თქმით, ამ თემაზე ხმამაღლა საუბარი ქართული ოცნების დეპუტატმა, ირაკლი ზარქუამ დაიწყო. პარტია მოქალაქეების პარლამენტში შესვლის შემდეგ კი შეიქმნა ერთობლივი ჯგუფი პარლამენტის თავმჯდომარესთან ერთად.

"ამბიციურ ხალხსაც პატივს ვცემ, მონდომებულ ხალხსაც პატივს ვცემ, მაგრამ, ზღვარი ნუ დაგვეკარგება ხოლმე. მინდა გიორგი ვაშაძეს მივმართო — შემოუერთდი შე დალოცვილო ამ სამუშაო ჯგუფს. ჩაკეტილი სივრცე კი არ გავაქვს და მასონთა ლოჟა კი არ გვაქვს იქ. არის ქართული ოცნება, რომელმაც გადაწყვეტილება უნდა მიიღოს საბოლოო ჯამში და მიაღებინოს უწყებებთან ერთად ლიბერთი ბანკს, ვართ ჩვენ. სივრცე ღიაა, ბევრი ადამიანი დაეტევა პარლამენტის თავმჯდომარის კაბინეტში [...]

ერთად გამოვგლიჯოთ ლიბერთი ბანკს პენსიონერების სასარგებლო გადაწყვეტილება და არ გვინდა ეს ცალ-ცალკე პენსიონერების წინაშე კეკლუცობა", — განაცხადა ელისაშვილმა.

ამ განცხადების შემდეგ ირაკლი ზარქუამ ალეკო ელისაშვილს "სიმართლისთვის და სამართლიანობისთვის" მადლობა გადაუხადა.