საქართველოში ოფიციალური ვიზიტით რუმინეთის, ავსტრიისა და ლიეტუვას საგარეო საქმეთა მინისტრები ჩამოვლენ. ამის შესახებ ინფორმაციას რუმინეთის საგარეო საქმეთა მინისტრი, ბოგდან აურესკუ, ტვიტერის საკუთარ გვერდზე ავრცელებს.

გამოქვეყნებულ პოსტში ბოგდან აურესკუ ამბობს, რომ ვიზიტის მიზანი ევროკავშირის მიერ აღმოსავლეთ პარტნიორობის ოთხი ქვეყნის მხარდაჭერაა, მათ შორის, კონფლიქტების საკითხებში.

"ევროკავშირი მხარდაჭერას უცხადებს აღმოსავლეთ პარტნიორობის ოთხ ქვეყანას. რაც ასევე გულისხმობს ევროკავშირის უფრო მეტ ჩართულობას, მათ შორის გაჭიანურებული კონფლიქტებში. ევროკავშირის უმაღლესი წარმომადგენლისა და ვიცეპრეზიდენტ ჯოზეფ ბორელის მანდატით, ავსტრიის საგარეო საქმეთა მინისტრ ალექსანდერ შალენბერგთან და ლიეტუვას საგარეო საქმეთა მინისტრ გაბრიელიუს ლანდსბერგისთან ერთად 24-26 ივნისს ჩვენ ვეწვევით სამხრეთ კავკასიის ქვეყნებს: სომხეთს, აზერბაიჯანსა და საქართველოს", — წერს რუმინეთის საგარეო საქმეთა მინისტრი.

ვიზიტი სამხრეთ კავკასიაში 24-26 ივნისს გაიმართება, თუმცა ამ ეტაპზე ზუსტი განრიგი უცნობია.