"ქართულმა ოცნებამ გუშინ კორცხელში სისხლიანი ანგარიშსწორება ოპონენტების წინააღმდეგ, მოსახლეობის დაშინების მიზნით, მოაწყო" - ასე ეხმაურება ნაციონალური მოძრაობის პოლიტსაბჭოს თავდჯომარე, დავით ბაქრაძე გუშინ ზუგდიდში, შუალედური არჩევნების დროს მომხდარ დაპირისპირებას.

ბაქრაძის განმარტებით, ის განცხადებები, რომლებზეც აღნიშნულ ფაქტთან დაკავშირებით ქართული ოცნების წარმომადგენლები აკეთებენ, უზნეო და ალოგიკურია. მისი თქმით, ისინი ცდილობენ მსხვერპლის მოძალადედ გამოჩენას:

"ქედს ვიხრით თითოეული იმ ამომრჩევლის წინაშე, რომელიც მიუხედავად ფიზიკური ძალადობის, მიუხედავად იქ მობილიზებული ზონდერ ჯგუფების, მიუხედავად აგრესიისა, მივიდა და საკუთარი პოზიცია დააფიქსირა".

ბაქრაძემ ასევე განაცხადა, რომ ოქტომბრის არჩევნების შემდეგ ქვეყანაში ძალადობა, შურისძიება და დაპირისპირება შეწყდება.

ზუგდიდში, კორცხელის საარჩევნო უბანზე, სადაც შუალედური ადგილობრივი თვითმმართველობის არჩევნები მიმდინარეობდა, ნაციონალური მოძრაობის წევრებს, მათ შორის გიგა ბოკერიასა და ნიკა მელიას, ფიზიკური შეურაცხყოფა მიაყენეს.