გახსოვთ ალბათ, რომ რამდენიმე თვის წინ ერთ-ერთი კვლევის შედეგები გამოქვეყნდა, რომლის მიხედვითაც ინტერნეტმომხმარებელთა 70% გაზიარებული ბმულის მხოლოდ სათაურს კითხულობს და ტექსტის წაუკითხავად ებმება დისკუსიაში.

ტექსტის წაკითხვის გარეშე დისკუსიაში ჩაბმა ან კამათის წამოწყება ან სულაც ლანძღვა-გინების დაწერა მაშინაც ხდება, როცა მომხმარებელი გაზიარებულ ბმულს დააკლიკავს და სტატიაზე გადავა. ხშირია, როცა ასეთ შემთხვევებში მკითხველი პირდაპირ კომენტარების სექციაში გადადის და არარელევანტურ ან არაკომპეტენტურ კომენტარს წერს.

ამ პრობლემასთან საბრძოლველად ერთ-ერთმა ნორვეგიულმა ნიუს სააგენტომ ახალი მეთოდი დანერგა.

ნორვეგიის საზოგადოებრივი მაუწყებლის ერთ-ერთი გამოცემა NRKBeta თავის მკითხველს კომენტარის დატოვებამდე სტატიის შინაარსის შესახებ პატარა ტესტს უტარებს და მხოლოდ სწორი პასუხების გაცემის შემდეგ უხსნის კომენტარის ველს.

ფოტო: NRK

ტესტის იდეა ჯერჯერობით გამოცდის ეტაპზეა და მხოლოდ სენსიტიური თემებისთვისაა გააქტიურებული. მეთოდის გამართლების შემთხვევაში, NRK მის მთელ სისტემაში დანერგვას აპირებს.