სოფელ თხინვალაში მოსახლეობის თხოვნით გიორგი ანწუხელიძის სახელობის სკვერი მოეწყობა. ამის შესახებ თბილისის მერიის მთავრობის სხდომაზე კახა კალაძემ ისაუბრა.

როგორც მან აღნიშნა, თხინვალში იყო მუნიციპალური ტერიტორია, რომელიც გასხვისდა, მოსახლეობის თხოვნა კი იყო, რომ იქ სკვერი მოწყობილიყო. მისივე თქმით, გიორგი ანწუხელიძე სოფელ თხინვალას ხშირად სტუმრობდა, სადაც მის შვილებს სახლი დღესაც აქვთ.

"როგორც იცით, გიორგი ანწუხელიძე ხშირად სტუმრობდა სოფელ თხინვალას, სადაც მისი დედა, ლილი ანწუხელიძე ცხოვრობდა. ჩვენი ეროვნული გმირის, გიორგი ანწუხელიძის შვილებს — ლევანს და ანას დღესაც აქვთ სახლი თხინვალაში და მათ ექნებათ შესაძლებლობა, გმირი მამის სახელობის სკვერში დაისვენონ. ძალიან ლამაზი სივრცე იქნება. ახლოს არის სპორტული მოედანიც და თუ მისი რეაბილიტაცია იქნება საჭირო, მასაც განვაახლებთ", — განაცხადა კახა კალაძემ.