UEFA-მ უკრაინას მიუთითა რომ ევროპის ჩემპიონატისთვის ნაკრების ეროვნული ფორმა შეცვალოს. AP-ის ინფორმაციით, გადაწყვეტილება UEFA-მ მას შემდეგ მიიღო, რაც რუსეთმა ფორმის გამო იჩივლა.

უკრაინის ნაკრების ფორმა გამაღიზიანებელი აღმოჩნდა რუსეთისთვის, რადგან იქ ქვეყნის კონტურებია გამოსახული, მათ შორის ყირიმის, რომელიც 2014 წლიდან რუსეთის მიერაა ოკუპირებული. აქამდე UEFA აცხადებდა, რომ უკრაინის ეროვნული ნაკრების ფორმა ეკიპირებასთან დაკავშირებული ნორმების შესაბამისად იყო დამტკიცებული.

UEFA-ს გადაწყვეტილებით, მაისურზე რუკის კონტურები დარჩება. თუმცა საყელოზე დატანილი ფრაზა "დიდება გმირებს" უნდა წაიშალოს. ხოლო ფრაზა "დიდება უკრაინას" შეიძლება დარჩეს.

რუსი კანონმდებლები ამტკიცებენ, რომ ამ ორ ფრაზას უკრაინელი ნაციონალისტები იყენებდნენ, რომელთა ნაწილიც მეორე მსოფლიო ომის დროს ნაცისტებთან ერთად საბჭოთა კავშირის წინააღმდეგ იბრძოდა. მათ UEFA-ს მიმართეს, რათა უკრაინას ფორმა სრულად შეეცვალა, თუმცა ორგანიზაციამ საჩვრის ნაწილი დააკმაყოფილა.

UEFA აცხადებს, რომ "დიდება გმირებს" გასული წლის დეკემბერში დასაშვებად ცნო მეორე ფრაზისგან დამოუკიდებლად, რომელსაც დასტური ორი წლით ადრე მისცა.

"ორი ლოზუნგის კომბინაცია ღიად პოლიტიკურად მიიჩნევა, რომელსაც ისტორიული და მილიტარისტული მნიშვნელობა აქვს. ამიტომაც კონკრეტული ლოზუნგი მაისურის შიდა მხარიდან უნდა წაიშალოს", — ნათქვამია ორგანიზაციის განცხადებაში.