კულტურის კომიტეტის თავმჯდომარის, ელისო ბოლქვაძის განცხადებით, იუნესკოს შემოქმედებითი ქალაქების პროექტის ფარგლებში საქართველო ქალაქ ბათუმის წარდგენას გეგმავს. პარლამენტის პრესსამსახურის ცნობით, ამ საკითხის განსახილველად ბოლქვაძე იუნესკოს გენერალური დირექტორის მოადგილეს კულტურის საკითხებში, ერნესტო ოტონეს შეხვდა.

"ვისაუბრეთ, ასევე, მსოფლიო კულტურული მემკვიდრეობის დაცვის კონვენციის 50 წლისთავისადმი მიძღვნილი ღონისძიებების ციკლის თაობაზე, რომელიც 2022 წლისთვის იგეგმება. საქართველო, როგორც იუნესკოს წევრი ქვეყანა, საინტერესო პროგრამით ჩაერთვება ღონისძიებებში , რაც კიდევ ერთხელ წარმოაჩენს ჩვენი ქვეყნის უნიკალურ თვითმყოფად კულტურას", — განაცხადა ელისო ბოლქვაძემ.

პროექტის მიზანია მთელი მსოფლიოს მასშტაბით, ქალაქებს შორის თანამშრომლობა. ასევე, გაეროს მდგრადი განვითარების მიზნების განხორციელების ხელშეწყობა, ურბანული განვითარების გეგმაში კულტურის ინტეგრაცია, წევრი ქალაქების ინიციატივების წახალისება, რომლებიც კულტურული აქტივობების ფართოდ განხორციელებას შეუწყობს ხელს და კულტურულ ცხოვრებაში მოწყვლადი ჯგუფების მონაწილეობას გაზრდის.