იტალიელმა ხელოვანმა სალვატორე გარაუმ თავისი უხილავი ქანდაკება 18 000 დოლარად გაყიდა. როგორც ავტორი განმარტავს, ქანდაკება, სახელწოდებით Io Sono (მე ვარ), არსებობს, მაგრამ არამატერიალური ფორმით და ის უფრო "ვაკუუმია".

67 წლის ხელოვანმა თავისი იდეა უფრო განავრცო კიდეც: "ვაკუუმი ენერგიით სავსე სივრცეა და თუნდაც ის სულ ცარიელი იყოს და მასში არაფერი იყოს, ჰაიზენბერგის განუზღვრელობის პრინციპის თანახმად, ამ "არაფერსაც" აქვს წონა. შესაბამისად, მას აქვს ენერგია, რომელიც ნაწილაკებად გადაიქცევა და ჩვენში აღმოჩნდება".

აღნიშნული "ქანდაკება" გამიზნული იყო, რომ დაახლოებით მეტრნახევრიანი სიგრძის კვადრატულ სივრცეზე აღმართულიყო. ინსტრუქციის თანახმად, ამ "ქანდაკების კერძო სივრცეში აღმართვისას" სინათლის ან კლიმატის კონტროლი საჭირო არ არის. სალვატორე გარაუს თქმით, მართალია, მას ვერ დაინახავთ, მაგრამ ის ნამდვილად არსებობს.