"არადა უკვე შევწირე სამშობლოს ჩემი თავიც და ჩემი ქონებაც, თქვენთვის დასათმობი აღარ დამრჩა..." — ასე პასუხობს სოფელ მექვენას მაცხოვრებელი, მაკა სულაძე ნამახვანჰესის პროექტის დირექტორს, მერაბ ლომინაძეს. სულაძე თავის პასუხს Facebook-ზე წერს.

მერაბ ლომინაძე დარწმუნებულია, რომ კომუნიკაციისა და საკითხების განხილვის შემდეგ მაკა სულაძე სოფელ მექვენაში საკუთარ კარ-მიდამოს პროექტს დაუთმობს. ამის შესახებ მან ჟურნალისტებს განუცახადა.

"პროექტის შესაბამისად, იტბორება 3 სოფელი. დღეის მდგომარეობით, გადახდილია 35 მილიონი ლარი, კომპენსაციების სახით. დაკმაყოფილებულია, პრაქტიკულად, ყველა ის მოსახლე, რომელიც იმყოფებოდა დატბორვისა და ზემოქმედების არეალში, გარდა ერთი ქალბატონისა და ძალიან დიდ იმედს გამოვთქვამთ, რომ მას შემდეგ, რაც მოხდება შესაბამისი კომუნიკაცია და ამ საკითხების განხილვა, თუ რა სიკეთეები მოაქვს პროექტს, მას შემდეგ, დარწმუნებული ვარ, რომ ქალბატონი მაკაც დაგვთანხმდება და ასე ვთქვათ, თავის ძალიან საყვარელ ადგილს დაუთმობს თავის სამშობლოს", — განაცხადა მერაბ ლომინაძემ.

მაკა სულაძე სოფელ მექვენას მაცხოვრებელია. ის უარს ამბობს, მიწის გაყიდვაზე და რიონის ხეობაში ნამახვანჰესის კაშლის აშენებაზე. სულაძე ხეობაში უწყვეტი პროტესტის ერთ-ერთი ლიდერი და ორგანიზატორია.