სამსუნგი ახალ სმარტფონთან ერთად კიდევ ორ განსხვავებულ პროდუქტს შესთავაზებს მომხმარებლებს. საუბარია ტაბლეტ S3-სა და ინოვაციურ Galaxy Book-ზე.

Galaxy Tab S3 ანდროიდის, ხოლო Galaxy Book - Windows 10-ის სისტემაზე მუშაობს. ეს უკანასკნელი სამსუნგის გადაწყვეტილებით ორი განსხვავებული გაფართოებით გამოვა: 10,6" და 12". მიუხედავად განსხვავებული ოპერატიული სისტემებისა, საერთო მახასიათებლები მრავლადაა: ორივე მათგანს მოჰყვება S pen ანუ სენსორული კალამი და კლავიატურის მიმაგრებაც ორივე შემთხვევაში შესაძლებელია.

Galaxy Tab S3

ფოტო: LILI SAMS/MASHABLE

ერთი შეხედვითაც ჩანს, რომ სამსუნგის დიზაინერებმა ახალი ტაბლეტის შექმნისას ძალიან მოინდომეს Apple-ს iPad Pro-ს გადაფარვა.

პირველი, რაც ახალ ტაბლეტს ძველისგან განასხვავებს, შუშისა და მეტალის დიზაინია. როგორც მიმომხილველები ამბობენ, დიზაინი მიმზიდველი და კომფორტულია. ახალი ტაბლეტის სისქე მხოლოდ და მხოლოდ 6 მილიმეტრია. თუმცა უნდა აღვნიშნოთ ისიც, რომ კორპუსის უკანა, შუშის მხარეს ნათითურები ადვილად ემჩნევა.

ფოტო: LILI SAMS/MASHABLE

ახალი ტაბლეტი მკაფიო და სუფთა გამოსახულებას იძლევა. ეკრანზე არაჩვეულებრივად ჩანს როგორც ტექსტი, ასევე ფოტოები.

რაც შეეხება სისტემურ მონაცემებს: ტაბლეტი Qualcomm Snapdragon 820-ის პროცესორზე იმუშავებს. მას 4 GB-ის ოპერატიული მეხსიერება და 32 GB-იანი ტევადობა ექნება, რომლის გაზრდაც 256 GB-მდე იქნება შესაძლებელი დამატებითი მეხსიერების ბარათის ინტეგრირებით. ტაბლეტს 6000 mAh სიმძლავრის ბატარეა აქვს, რომლის დატენვაც USB-C პორტის დახმარებით საკმაოდ სწრაფად შეიძლება.

ტაბლეტის უკანა კამერა 13-მეგაპიქსელიანია, წინა კამერა კი 5-მეგაპიქსელიანი.

Home ღილაკზე ინტეგრირებულია თითის ანაბეჭდის ფუნქციაც.

როგორც კრიტიკოსები ამბობენ, ეს ყველაფერი მხოლოდ წინა ვერსიის გაუმჯობესებაა. სინამდვილეში, ახალი ტაბლეტის ნამდვილი სავიზიტო ბარათი მისი სენსორული კალამი და დამხმარე კლავიატურაა.

სენსორული კალმის გამოყენება არა მხოლოდ "სქროლვის" გასამარტივებლად, ან რაიმეს მოსანიშნად არის კომფორტული, არამედ GIF-ების გასაკეთებლად, ჩანახატებისთვის, ჩამქრალ ეკრანზე დასაწერად და ა.შ;

კლავიატურის მთავარი უპირატესობა ისაა, რომ ის მოწყობილობას მაგნიტური პორტით, Pogo-თი უერთდება. ღილაკები საკმაოდ კომფორტულია და მასზე მუშაობა მხოლოდ სიამოვნებას მოგანიჭებთ.

ფოტო: LILI SAMS/MASHABLE

Galaxy Book

ფოტო: LILI SAMS/MASHABLE

ახალი პროდუქტი, რომელსაც სამსუნგმა Galaxy Book უწოდა, ტაბლეტი S3-ის მსგავსია. ამ ორ პროდუქტს შორის მთავარი განსხვავება სისტემურ მონაცემებსა და ფუნქციონირებაშია.

როგორც უკვე აღვნიშნეთ, Galaxy Book ორი გაფართოებით იარსებებს. ორივე ვერსიას AMOLED ეკრანი ექნება. ის ოდნავ უფრო მძიმე და სქელი იქნება, ვიდრე ტაბლეტი S3.

10,6" Galaxy Book-ს მეშვიდე თაობის 2.6GHz Intel Core m3 dual-core პროცესორი უყენია. აგრეთვე, მას აქვს 4GB-იანი ოპერატიული მეხსიერება, 64 ან 128 GB-იანი მახსოვრობა და 5-მეგაპიქსელიანი წინა კამერა.

ორივე Galaxy Book ინოვაციური სწრაფი მეთოდით იტენება და დამატებითი მეხსიერების ბარათის მხარდაჭერაც გათვალისწინებულია.

თუ თქვენ იყენებთ სამსუნგის ანდროიდის ტელეფონს, ახალი მოწყობილობით სმარტფონის მართვას ადვილად შეძლებთ. დაკავშირების შემდეგ შეგეძლებათ გამოიყენოთ ისეთი თვისებები, როგორებიცაა: თითის ანაბეჭდით დაცვა, მესიჯზე პასუხის მიწერა და შემოსული ზარების კონტროლი.

ჯერჯერობით არ ვიცით, რა ეღირება ახალი პროდუქტები. ფასებს, სავარაუდოდ, Samsung Galaxy S8-ს გამოსვლასთან ერთად მარტში შევიტყობთ.