ვამპირის დღიურების შემქმნელები — ჯული პლეკი და მარგერიტ მაკინტაირი — ახალი ვამპირული ისტორიის სამზადისში არიან. ისინი ერთობლივად იმუშავებენ მსოფლიო ბესტსელერი წიგნების სერიის — ვამპირების აკადემიის — ეკრანიზაციაზე, რომელიც სერიალად იქცევა სტრიმინგ პლატფორმა Peacock-ისთვის.

ამერიკული გამოცემების ცნობით, ვამპირების აკადემია, რომლის ავტორიც რიშელ მიდია, პლეკის საყვარელი წიგნების სერიაა და მისი ადაპტაცია სცენარისტსა და პროდიუსერს დიდი ხნის განმავლობაში სურდა.

"ჯული პლეკმა შექმნა მაყურებლების ერთ-ერთი ყველაზე საყვარელი სამყარო ვამპირის დღიურებში და მის სპინოფებში, ორიგინალებსა და მემკვიდრეობაში. ახლა კი, ამ სერიალების აუდიტორიას სიხარულით ვთავაზობთ ახალ ისტორიას ჩვენს პლატფორმაზე", — აცხადებს NBCUniversal-ის ხელმძღვანელი, ლისა კეცი, — "ჯული ჩამთრევი, დამატყვევებელი ისტორიების შექმნითაა ცნობილი და დარწმუნებულები ვართ, ვამპირების აკადემიაც მიაჯაჭვებს მაყურებელს ეკრანებთან".

პლატფორმის ხელმძღვანელის აღფრთოვანებას იზიარებს პლეკიც.

"როცა Universal Television-თან კონტრაქტი გავაფორმე, მკითხეს, რომელი პროექტის განხორციელება მსურდა ყველაზე მეტად და მეც მაშინვე ვუპასუხე, რომ ეს ვამპირების აკადემიის ეკრანიზაცია იყო", — აღნიშნავს სცენარისტი და პროდიუსერი.

მის გარდა, პროექტზე იმუშავებს მარგერიტ მაკინტაირიც, რომელმაც ვამპირის დღიურებში როლი შეასრულა, მოგვიანებით კი სერიალის სპინოფების ერთ-ერთი ავტორი გახდა.

ორივე მათგანი ერთობლივად შექმნიან სერიალის სცენარს და იქნებიან პროექტის აღმასრულებელი პროდიუსერები.

ვამპირების აკადემია ამერიკელი მწერლის, რიშელ მიდის, ექვსწიგნეული სერიაა, რომელიც განსაკუთრებული პოპულარობით სარგებლობს ახალგაზრდა მკითხველებს შორის. წიგნები ითარგმნა 35 ენაზე და მსოფლიოში 8 მილიონ ეგზემპლარად გაიყიდა. ავტორის თქმით, ისტორიის ინსპირაცია სლავური მითოსი გახდა.

რომანებში ისტორია ჩვენს სამყაროში მიმდინარეობს, სადაც ორი ტიპის ვამპირები ცხოვრობენ. ერთი ბოროტი, მკვდარი ვამპირები არიან — სტრიგოიები, მეორენი კი — ცოცხალი მოროიები. ამას გარდა, არსებობენ დამპირები, ნახევრადადამიანები, რომლებიც მოროიების მცველები არიან. წიგნები კი ორი მეგობრის — სამეფო მოროი ვასილისა დრაგომირისა და მისი მცველის, დამპირი როუზ ჰეთეუეის — შესახებაა. ორივე მათგანი ვამპირების აკადემიაში სწავლობს — სასწავლებელში, სადაც ვამპირები ცოდნასა და მაგიას ეუფლებიან.

სერიის ქართულ ენაზე თარგმნა გამომცემლობამ წიგნები ბათუმში დაიწყო 2015 წელს. ამ დრომდე თარგმნილია საგის 4 წიგნი.

პირველი ნაწილის მიხედვით რეჟისორმა მარკ უოტერსმა გადაიღო ფილმი, რომელიც 2014 წელს გამოვიდა. მასში მთავარ როლებს ზოი დოიჩი, ლუსი ფრაი და დანილა კოზლოვსკი ასრულებენ. თუმცა, კომერციული წარუმატებლობის გამო, პროექტი აღარ გაგრძელებულა.