ქართული ოცნების დეპუტატის, ირაკლი ზარქუას განცხადებით, საქართველოს ექსპრეზიდენტს, მიხეილ სააკაშვილს "ხვალაც შეუძლია აიღოს ბილეთი და დაბრუნდეს". ზარქუას თქმით, სააკაშვილს მატროსოვის ციხე ელოდება. ამის შესახებ მან POSTV-ის ეთერში ისაუბრა.

"ხვალაც შეუძლია აიღოს ბილეთი და ბატონ მელიასთან ერთად დაბრუნდეს ძებნილი და მსჯავრდებული ბატონი სააკაშვილი. მარტივად, მას ელოდება მატროსოვის ციხე. იმ შემთხვევაში, თუ მას ჰგონია, რომ მართალია, შეუძლია იდავოს, მიიღოს სასამართლო პოლემიკაში მონაწილეობა და თუ ამას არ დასჯერდება — სტრასბურგი, მარტივია. არა, მან იცი, რაც აქვს ჩადენილი და ამიტომ არის იქიდან, რაღაც ამბებს ჰყვება და გულზე არის. არ მომისმენია, ამჯერად არ უთაქვამს როდის ჩამოვა? თუ გადადო კიდევ?", — თქვა მან.

16 მაისს ნიკა მელია კიევში მიხეილ სააკაშვილთან შესახვედრად გაემგზავრა. მისი თქმით, საკაშვილი და ის ერთმანეთს საკუთარ ხედვებს გააცნობენ. მელიას განცხადებით, მასსა და ექს-პრეზიდენტ მიხეილ საკაშვილს შორის ურთიერთობაზე ბევრი რამ არის დამოკიდებული.

6-თვიანი ბოიკოტის შემდეგ, ოპოზიციის ნაწილმა დოკუმენტს ხელი მოაწერა და 27 აპრილს პარლამენტში მივიდა. დოკუმენტს ხელს არ აწერს ნაციონალური მოძრაობა. პარტიაში ამბობდნენ, რომ დოკუმენტს ხელს ნიკა მელიას გათავისუფლებამდე არ მოაწერდნენ. აღსანიშნავია, რომ დოკუმენტს ინდივიდუალურად მოაწერა ხელი სალომე სამადაშვილმა.

პარტიის წევრების ცნობით, ამ ეტაპზე ენმ-ში მსჯელობენ იმაზე, შევლენ თუ არა პარლამენტში. როგორც ნაციონალური მოძრაობის თავმჯდომარემ, ნიკა მელიამ 12 მაისს განაცხადა, პარლამენტში შესვლის შესახებ პარტიაში "მჭიდრო კონსულტაციები" მიმდინარეობს და გადაწყვეტილება უახლოეს პერიოდში იქნება ცნობილი.