საქართველოს ექსპრეზიდენტის, მიხეილ სააკაშვილის განცხადებით, ნაციონალური მოძრაობის თავმჯდომარის, ნიკა მელიას ადგილზე ციხიდან გამოსვლის შემდეგ დაისვენებდა, მაგრამ მისი თქმით, მელიას "იმხელა დრაივი და ენერგია აქვს", ერთი წამი არ შეუძლია "დაჯდომა და დასვენება".

"ძალიან ბედნიერი ვარ, რომ ნამდვილი გმირი, ნიკა მელია ჩამოსულია კიევში ხანმოკლე, ძალიან დატვირთული სამუშაო ვიზიტით. მე მის ადგილზე დავისვენებდი ციხის შემდეგ, მაგრამ რასაც ვატყობ, იმხელა ენერგია და იმხელა დრაივი აქვს, რომ ერთი წამი არ შეუძლია დაჯდომა და დასვენება. რაც ნიშნავს იმას, რომ რაც არის გამარჯვების საწინდარი. ძალიან მაღალი ტალღა ასწია ქართველი ხალხის დასახმარებლად, ჩემი აზრით, უნიკალური კომბინაციაა, ასე, რომ ძალიან ვამაყობ, რომ მისი თანამებრძოლი ვარ, აღფრთოვანებული ვარ მისი გამბედაობით, პრინციპულობით, შეუვალობით", — თქვა მან.

16 მაისს ნიკა მელია კიევში მიხეილ სააკაშვილთან შესახვედრად გაემგზავრა. მისი თქმით, საკაშვილი და ის ერთმანეთს საკუთარ ხედვებს გააცნობენ. მელიას განცხადებით, მასსა და ექს-პრეზიდენტ მიხეილ საკაშვილს შორის ურთიერთობაზე ბევრი რამ არის დამოკიდებული. ამის შესახებ მან კიევში გამგზავრებამდე ტელეკომპანია ფორმულას გადაცემა დროებაში ისაუბრა.

6-თვიანი ბოიკოტის შემდეგ, ოპოზიციის ნაწილმა დოკუმენტს ხელი მოაწერა და 27 აპრილს პარლამენტში მივიდა. დოკუმენტს ხელს არ აწერს ნაციონალური მოძრაობა. პარტიაში ამბობდნენ, რომ დოკუმენტს ხელს ნიკა მელიას გათავისუფლებამდე არ მოაწერდნენ. აღსანიშნავია, რომ დოკუმენტს ინდივიდუალურად მოაწერა ხელი სალომე სამადაშვილმა.

პარტიის წევრების ცნობით, ამ ეტაპზე ენმ-ში მსჯელობენ იმაზე, შევლენ თუ არა პარლამენტში. როგორც ნაციონალური მოძრაობის თავმჯდომარემ, ნიკა მელიამ 12 მაისს განაცხადა, პარლამენტში შესვლის შესახებ პარტიაში "მჭიდრო კონსულტაციები" მიმდინარეობს და გადაწყვეტილება უახლოეს პერიოდში იქნება ცნობილი.