საქართველოს ექსპრეზიდენტის, მიხეილ სააკაშვილის განცხადებით, ნაციონალური მოძრაობის თავმჯდომარე, ნიკა მელია მისი აზრით, უკვე გამარჯვებულია, რადგან ის არათუ ვერ გატეხეს ციხეში, არამედ მან "ციხის, რეპრესიების, ზეწოლების შიში საერთოდ გააქრო". ამის შესახებ მან Facebook-ზე გავრცელებულ ვიდეოში ისაუბრა.

"ჩემი აზრით, უკვე გამარჯვებულია იმიტომ, რომ რეალურად, ვერ გატეხეს. არა მხოლო ვერ გატეხეს, ციხის შიში საერთოდ გააქრო, გააქრო შიში რეპრესიების, ზეწოლების, სხვადასხვა პირობითობების, რაც ამდენი წელი არსებობდა. იმიტომ, რომ როცა ადამიანი ასეთ სტანდარტს ქმნის, მერე სხვებიც ვალდებულები არიან, მიჰყვნენ მის გამბედაობას და მის სტანდარტს", — თქვა მან.

16 მაისს ნიკა მელია კიევში მიხეილ სააკაშვილთან შესახვედრად გაემგზავრა. მისი თქმით, საკაშვილი და ის ერთმანეთს საკუთარ ხედვებს გააცნობენ. მელიას განცხადებით, მასსა და ექს-პრეზიდენტ მიხეილ საკაშვილს შორის ურთიერთობაზე ბევრი რამ არის დამოკიდებული. ამის შესახებ მან კიევში გამგზავრებამდე ტელეკომპანია ფორმულას გადაცემა დროებაში ისაუბრა.

6-თვიანი ბოიკოტის შემდეგ, ოპოზიციის ნაწილმა დოკუმენტს ხელი მოაწერა და 27 აპრილს პარლამენტში მივიდა. დოკუმენტს ხელს არ აწერს ნაციონალური მოძრაობა. პარტიაში ამბობდნენ, რომ დოკუმენტს ხელს ნიკა მელიას გათავისუფლებამდე არ მოაწერდნენ. აღსანიშნავია, რომ დოკუმენტს ინდივიდუალურად მოაწერა ხელი სალომე სამადაშვილმა.

პარტიის წევრების ცნობით, ამ ეტაპზე ენმ-ში მსჯელობენ იმაზე, შევლენ თუ არა პარლამენტში. როგორც ნაციონალური მოძრაობის თავმჯდომარემ, ნიკა მელიამ 12 მაისს განაცხადა, პარლამენტში შესვლის შესახებ პარტიაში "მჭიდრო კონსულტაციები" მიმდინარეობს და გადაწყვეტილება უახლოეს პერიოდში იქნება ცნობილი.