ტარიელ ნაკაიძის განცხადებით, არაა ვალდებული, რომ შარლ მიშელის ეგიდით შექმნილ დოკუმენტს ხელი მოაწეროს და ამისთვის კონკრეტული მიზეზები აქვს.

"მე ვფიქრობ, რომ არ ვარ ვალდებული, რომ ხელი მოვაწერო ამ შეთანხმებას უბრალო მიზეზის გამო, რომ უბრალოდ, არ ვეთანხმები ბევრ საკითხს. არ ვეთანხმები, მაგალითად 43%-იან დამოკიდებულებას, არ ვეთანხმები რიგ სხვა საკითხებს, თუნდაც მე ჯერ გარედან ვისმენ ამ ყველაფერს, კონკრეტულად დოკუმენტთან არ მქონია უშუალო შეხება და შეიძლება არასწორადაც ვთქვა რამე, მაგრამ არ ვეთანხმები, მაგალითად ამნისტიის იმ ფორმას, თუ ყველა გათავისუფლდება, დამნაშავეც და ამ შემთხვევაში მსხვერპლიც", — განაცხადა ნაკაიძემ ფორმულას ეთერში.

ევროპულმა საქართველომ დღეს, 18 მაისს განაცხადა, რომ არ აპირებს საპარლამენტო საქმიანობაში ჩართვას, ტარიელ ნაკაიძემ კი პარლამენტში შესვლა გადაწყვიტა.

აღსანიშნავია, რომ 2020 წლის არჩევნების შედეგად, ევროპულმა საქართველომ სულ 5 მანდატი მიიღო. მართალია, პარტია ოფიციალურად პარლამენტში არ შედის, მაგრამ იმ ადამიანებმა, რომლებიც არჩევნებზე ევროპულ საქართველოს წარმოადგენდნენ, საპარლამენტო საქმიანობაში ჩართვა გადაწყვიტეს. კერძოდ, დავით ბაქრაძემ, შალვა შავგულიძემ, არმაზ ახვლედიანმა და როგორც დღეს გახდა ცნობილი, ტარიელ ნაკაიძემაც. კიდევ ერთი მანდატი კი ელენე ხოშტარიას ეკუთვნის, რომელიც პარლამენტში შესვლას არ აპირებს, თუმცა უკვე დატოვა ევროპული საქართველო და ახალი პოლიტიკური მოძრაობა შექმნა.

ოპოზიციური პარტიების დიდი ნაწილი პარლამენტში შევიდა. განსხვავებული პოზიცია აქვს ლეიბორისტულ პარტიას, ასევე, ამ დროისთვის უცნობია ნაციონალური მოძრაობის საბოლოო გადაწყვეტილება.